УФ-м и Следственнэ комитет и ГъэIорышIапIэу АР-м щыIэм Мыекъо­пэ районымкIэ иследственнэ отдел къызэритырэмкIэ, илъэс 45-рэ зыныбжь хъулъ­фыгъэм уголовнэ Iоф къы­фызэIуахыгъ. Сакъыныгъэ къы­зэрэзыхимыгъэфагъэм ошIэ-дэмышIэ хьадэгъур къыхэкIыгъ.

Мэкъуогъум и 1-м щэджа-гъом адэжь икIалэу илъэси 7 зыныбжьыр игъусэу Мыекъопэ районым ит поселкэу Спокойнэм изыгъэпсэфыпIэ чIыпIэ щы­Iагъэх. Пцэжъые къаубытэу псыхъом дэжь щысыгъэх. Унэм хъулъфыгъэр ихьагъ, такъикъи­пшIэ къитыгъэу къызекIыжьым зыныбжь имыкъугъэ кIэлэцIыкIур Iусыжьыгъэп, щыгъыгъэ лъэкъопылъхьэхэр арых ныIэп къыIунагъэхэр.

Урысыем ошIэ-дэмышIэ Iоф­хэмкIэ и Министерствэ и Гъэ­IорышIапIэу щыIэм зэхищэгъэ лъыхъон-къэгъэнэжьын Iофхэм ауж кIэлэцIыкIум ихьадэ псым къыхагъотэжьыгъ. ДжырэкIэ Iо­фым изытет зэхафы.

УФ-м и Следственнэ комитет и ГъэIорышIапIэу АР-м щыIэр