Наркотикхэм апэуцужьырэ комиссиеу АР-м щызэхэщагъэм изэхэсы­гъоу республикэм и Правительствэ зычIэт унэм тыгъуасэ щыкIуагъэм Адыгеим и ЛIышъхьэу КъумпIыл Мурат тхьамэтагъор щызэрихьагъ.

Iофтхьабзэм хэлэжьагъэх АР-м и Къэралыгъо Совет —Хасэм и Тхьаматэу Владимир Нарожнэр, УФ-м и Президент и Полномочнэ лIыкIоу ЮФО-м щыIэм иаппарат Адыгэ Респуб­ликэмкIэ ифедеральнэ инспектор шъхьаIэу Сергей Дрокиныр, щынэгъончъэнымкIэ Федеральнэ къулыкъум Адыгэ РеспубликэмкIэ и ГъэIорышIа­пIэ, АР-м и МВД, АР-м ипрокуратурэ, уплъэкIунхэр зэхэзыщэрэ къулыкъухэм, муниципальнэ образованиехэм япащэхэр.

Зэхэсыгъом анахьэу зыщытегущыIагъэхэр зыныбжь имыкъугъэхэр наркотикхэм апыщагъэ мыхъунхэмкIэ амалэу зэрахьащтхэр ары.

АР-м гъэсэныгъэмрэ шIэныгъэмрэкIэ иминистрэу КIэрэщэ Анзаур къызэриIуагъэмкIэ, рес­публикэм иучреждениехэу гъэсэныгъэ языгъэгъотыхэрэм кIэ­лэеджакIохэр наркотикхэм апыщагъэ мыхъунхэмкIэ пэ­шIорыгъэшъ Iофтхьабзэхэр ре­нэу ащызэрахьэх. Iофтхьабзэу «Урысыем икIэлэцIыкIухэр» зыфиIорэм къыдыхэлъытагъэу кIэлэцIыкIухэмрэ ныбжьыкIэ­хэмрэ наркотикхэр къызфамыгъэфедэнхэм тегъэпсыхьэгъэ Iофтхьэбзэ 930-рэ республикэм мэлылъфэгъум щызэрахьагъ. Ащ хэхьэх десэ шъхьэихыгъэхэр, спорт зэнэкъокъухэр, цIыфхэр жъугъэу зыхэлэжьэрэ нэмыкI Iофтхьабзэхэр. КIэлэеджэкIо мин 50 фэдиз а Iофтхьабзэхэм ахэлэжьагъ.

Наркотикым пыщагъэ хъун зылъэкIыщт кIэлэцIыкIухэм ­якъыхэгъэщынкIи республикэм гъэсэныгъэмкIэ иучреждениехэм Iоф гъэнэфагъэ ащызэрахьэ. КIэлэеджакIохэмрэ студентхэмрэ социальнэ-психологи­ческэ тестхэр арагъэкIух. Гъэсэныгъэ языгъэгъотырэ орга­низации 137-рэ ащ фэдэ тестхэм 2021-рэ илъэсым ахэлэ­жьагъ. ЕджэкIо 22406-мэ со­циальнэ-психологическэ тестхэр атынхэ фаеу агъэнэфагъ.

Адыгеим и ЛIышъхьэ пшъэ­рылъ афишIыгъ мы лъэныкъом, анахьэу республикэм истудентхэр къыхырагъэубытэзэ, Iофэу щашIэрэр нахь агъэлъэшынэу. Наркотикхэм зэрарэу къа­хьырэр агурыгъэIогъэнымкIэ культурэмкIэ учреждениехэм Iофэу ашIэрэм фэгъэхьыгъэу Адыгэ Республикэм культу­рэмкIэ иминистрэу Аулъэ Юрэ къыIотагъ.

Адыгеим культурэ учреж­дении 132-рэ ит, самодеятельнэ народнэ творчествэм пы­щэгъэ клуб 938-рэ ахэм ащызэхэщагъ. Ахэм ахэхьэх теат­ральнэ, музыкальнэ кружокхэр, орэдIонымкIэ ыкIи къэшъонымкIэ кружокхэр. Ахэм нэбгырэ мин 13-м ехъу къякIуалIэ. А кружокхэр анахьэу зыфытегъэ­псыхьагъэхэр ныбжьыкIэхэр творчествэм пыщэгъэнхэр, шэн дэйхэр ахэм къахэмыфэнхэр ары.

Муниципальнэ образованиехэу «Къалэу Мыекъуапэрэ» «Теуцожь районымрэ» хэбзэнчъэу наркотикхэр къащырамыгъэкIокIынымкIэ Iофэу ашIэрэм фэгъэхьыгъэ докладми зэхэсыгъом щедэIугъэх. Республикэм и ЛIышъхьэ зэхэсыгъом щыхигъэунэфыкIыгъ лъэныкъо пстэури къыдалъытэзэ наркоманием республикэм щыпэуцужьыгъэным мэхьанэшхо зэриIэр.

«Лъэпкъ проектхэм адиштэу социальнэ псэуалъэхэр — культурэмкIэ унэхэр, стадионхэр, цIыфхэм япсауныгъэ зыщагъэпытэрэ физкультурэ комплекс­хэр, джэгупIэхэр муниципа­литетхэм ащытэгъэпсых ыкIи ащы­тэгъэцэкIэжьых. ЦIыфхэр спортым пыщэгъэнхэм, шэн дэй­хэм зыщадзыенхэм нахь лъэшэу тынаIэ тедгъэтын фае. Iэтахъохэу наркотикхэр къыз­фэзыгъэфедэхэрэр нахь пасэу къы­хэгъэщыгъэнымкIэ Iофэу тшIэрэр дгъэлъэшын фае», — къыIуагъ КъумпIыл Мурат.

Республикэм и ЛIышъхьэ министерствэхэу, ведомствэхэу псауныгъэм икъэухъумэн, гъэсэныгъэм, культурэм, спортым афэгъэзагъэхэм, къэбар жъугъэм иамалхэм пшъэрылъ афишIыгъ ныбжьыкIэхэр нар­ко­манием пыщагъэ мыхъунхэмкIэ язэдэлэжьэныгъэ нахь агъэ­лъэ­шынэу. Социальнэ псэуалъэхэу ашIыгъэхэм е агъэцэкIэжьыгъэ­хэм спорт, культурэ Iофтхьэбзэ гъэшIэгъонхэр ащызэрахьанхэ зэрэфаем анаIэ тыраригъэ­дзагъ.

Адыгэ Республикэм и ЛIышъхьэ ипресс-къулыкъу