ЕджапIэхэм къачIэкIыхэрэм яушэтынхэр графикым тетэу, зэпымыоу мы мафэхэм макIох. Ащ фэдэу мэкъуогъум и 11-м зичэзыу экза­менхэр тарихъымрэ физикэмрэкIэ кIуагъэх.

Ахэр экзамен IыхыпIи 9-мэ ащызэхащэгъагъэх. Мы предметхэр шIокI имыIэу атынхэ фэе ушэтынхэм ахэтхэп, ау ахэр бэмэ къыхахых. ГущыIэм пае, мыгъэ тарихъыр нэбгырэ 396-мэ къыхахыгъ, физикэмкIэ экзаменыр нэбгырэ 298-мэ атыгъ. Роспотребнадзорым ишапхъэхэм адиштэу экзамен тыпIэхэр щынэгъончъэу гъэпсыгъагъэх. Ахэри, ахэм къяшIэ­кIыгъэ щагухэри МВД-м ыкIи Росгвардием якъулыкъушIэхэм къаухъумэх.

Ушэтынхэр нахь шъхьэихыгъэу зэхэщэгъэнхэм пае ахэм алъыплъэрэ Гупчэ зэхащагъэу общественностым илIыкIохэр онлайн шIыкIэм тетэу экзаменхэр зэрэкIохэрэм лъыплъагъэх.

Къэралыгъо аттестационнэ къулыкъум къызэритырэмкIэ, тарихъымрэ физикэмрэкIэ гъэцэкIэнхэр IахьитIоу зэхэтыгъэх. Апэрэм джэуап кIэкI къыщып- тын фэягъ. ЯтIонэрэм нахь игъэкIотыгъэу джэуапыр къыщипIотыкIынэу щытыгъ. Физи­кэмкIэ экзаменым линейкэрэ программэ зыхэмыт калькуляторрэ зыдычIахьан фитыгъэх. ТарихъымкIэ зыпари зыдычIэпхьанэу щытыгъэп. Ау гъэцэ­кIэн­хэм къахэфэх картэхэр, сурэтхэр, хъугъэ-шIагъэхэр зыщыIэгъэхэ илъэсхэр. Ахэр агъэ­федэнхэ фитыгъэх экзамен зы­тыхэрэм.

ЭкзаменитIури сыхьати 3-рэ такъикъ 55-рэ кIуагъэх. Тари­хъымкIэ ушэтыныр птыгъэу алъы­тэным пае балл 36-рэ, физикэмкIэ — 32-рэ къэпхьын фае. Апшъэрэ еджапIэм чIэ­хьа­нэу зызыгъэхьазырырэм фи­зи­кэмкIэ балл 39-рэ, тарихъымкIэ 35-рэ къыхьын фае.

Экзаменхэр мы мафэм зымытышъугъэхэм е экзамен ты­пIэм зэрэфэбгъэгъун ушъхьагъу иIэу къэмыкIошъугъэм ушэ­тыныр тарихъымкIэ мэкъуогъум и 28-м, бэдзэогъум и 2-м ыкIи и 12-м атыжьын алъэкIыщт. Физикэр мэкъуогъум и 29-м, бэдзэогъум и 2-м ыкIи и 14-м атыжьын фитых. А мафэхэми зымытышъухэрэм бэдзэогъум и 17-м атыжьынэу амал яIэщт.

Мэкъуогъум и 15-м общест­вознаниемкIэ ушэтыныр акIугъ. Республикэм экзамен IыхыпIи 9-мэ ар ащатыгъ.

Илъэсыбэ хъугъэу мы предметыр анахьыбэмэ къыхахы. Мыгъи ащ фэдэу ар нэбгырэ 818-мэ атыгъ.

Экзаменым зэкIэмкIи гъэцэ­кIэн 29-рэ къыдилъытэщтыгъ. Ахэм ащыщэу 12-р къызэрыкIохэу, базовэ шапхъэм ди­штэ­хэу щытыгъэх, 10-р нахь къиныгъ, 7-р ахэм анахь къины­жьыгъ.

Экспертхэм къызэраIорэмкIэ, обществознаниемкIэ гъэцэкIэнхэм мыгъэ зыпари зэхъокIыныгъэ афэхъугъэп.

Экзаменыр птыгъэу алъытэным пае балл 42-м къыщымыкIэу къэпхьын фае. Ар изымыгъэкъурэр апшъэрэ еджапIэм аштэщтэп.

Ушэтыным икIэуххэр мэкъуогъум и 30-м нахь мыкIасэу къараIожьыщтых.

Сихъу Гощнагъу.