Урысые Федерацием инароднэ артистэу Кукэнэ Мурат «Спутник V» зыфиIорэ вакцинэр зыхязыгъэлъхьагъэхэм ащыщ. Гъэтхапэм и 21-м — апэрэ Iахьыр, мэ­лылъ­фэгъум и 15-м — ятIонэрэр халъхьагъэх.

ЗэлъашIэрэ артистым къызэриIо­рэмкIэ, ар ежь ишIоигъоныгъэу щытыгъ: «Афыпсыпэ сыщыIэу чылэм дэт сымэджэщым хэт IэзапIэм прививкэ зыщязгъэшIыгъ. Зэуи къысэхьылъэкIыгъэп. ЦIыфхэм бэрэ тахахьэ, тахэкIы, мары тыгъуасэ творческэ пчыхьэзэхахьэ Адыгэ Республикэм и Лъэпкъ тхылъеджапIэ щысиIагъ. Ащ фэдэу Улапэ, Хьатикъуае, Мыекъопэ къэралыгъо технологическэ университетым ситворческэ зэIукIэгъухэр ащыкIуагъэх. ЦIыфыбэ зыщызэрэу­гъоирэ чIыпIэхэр узэу къекIокIырэмкIэ щынагъох. Псауныгъэм унаIэ нахь гъэлъэшыгъэу зыщытебгъэтын фэе уахътэм тыкъыхиубытагъ. Ковидыр зэрэдунаеу щанэсыгъ. Сымэджагъэ­хэм япчъагъэ бэ. Узыр къыуихьылIэнышъ, уебэнын нахьи, вакцинэр зы­хэплъхьанышъ, уипсауныгъэ къэу­ухъумэныр нахь тэрэзэу сэ сегупшысагъ. Сэ сшъхьэ закъоп, мыщ дэжьым сиунагъо щыщхэми сафегу­пшысагъ. Узыр къызыппыхьэкIэ, унагъом щыщ­хэри къэсымэджэнхэм ищынагъо щыI. СэркIэ ар пшъэ­дэкIыжь ин. Творческэ цIыфым игу­зэхашIэхэр нахь лъэшых. Нэрмы­лъэгъу щынагъоу къытшъхьарыхьагъэм уегупшысэ зэпыты зы­хъукIэ, ар щэчыгъуае. Прививкэр пшIыгъахэ хъумэ, нахь ухъумагъэ охъу, нахь орэхьаты, узыр къыппы­хьагъэми, ащ фэдизэу иягъэ къыуимыгъэкIыным ишIошъхъуныгъэ къып­хелъхьэ. Вакцинэ зыхябгъэлъхьащтми зыхямы­гъэлъхьащтми — ар шъхьадж унашъоу зыфишIыжьырэм елъытыгъэу мэпсэу, цIыфхэм сыкъяджэкIи арэп. Сэ сшъхьэкIэ, сыгукIэ ащ фэдэ унашъо зыфэсшIыжьи згъэцэкIагъэ. Джы «антитела» зыфаIохэрэр сиIэхэмэ зэзгъэшIэн симурад, анализхэр стынхэу сыгу хэлъ. Пстэуми псауныгъэ пытэ Тхьэм къытет!»

Тэу Замир.