Илъэс 20 — 30-кIэ узэкIэIэбэжьмэ, лъэпкъыбэм зэдыряеу, ялъэпIэ усакIоу А. Пушкиным иусэхэр ини цIыкIуи, жъи кIи къаIутэкъу­щты­гъэх, ягуапэу езбырэу къаIощтыгъэх.

Джырэ мафэхэм Iофыр ащ темытыжь дэдэми, ащ итхылъхэр анахь заджэхэрэм ащыщых. Ахэм гъэсэныгъэ-пIуныгъэ мэхьанэшхоу яIэм къыщыкIэрэп. А. С. Пушкиныр къызы­хъугъэ мафэм, мэкъуогъум и 6-ми, Урысыем ыкIи Адыгеим иеджапIэхэм, итхылъеджапIэхэм литературнэ сыхьатхэр, зэ­IукIэгъухэр, викторинэхэр, зэнэкъо­къухэр ащызэхащагъ, ахэм еджэкIо чаныбэ ахэлэ­жьагъ.

Гавердовскэ чIыпIэ тхылъ еджапIэу N 10-м Iофтхьэбзэ кIэракIэ «У Лукоморья» ыIоу, сурэтхэмкIэ гъэдэхагъэу, еджэпIэ лагерэу N 18-м щыIэ кIэлэцIыкIухэр хагъэлажьэхи щырагъэкIокIыгъ. «Урыс усэкIошхоу А. С. Пушкиныр шъо дэгъоу шъошIа, ипшысэхэр къэшъоIуа­тэха?» ащ цIэу иIагъэр.

КIэлэцIыкIухэм яамал къы­зэрихьэу Пушкиным ехьылIа­гъэу ашIэрэр, якIэсэ пшысэхэр, усэхэр, ытхыгъэхэм ащыщ пы­чыгъохэр къарагъэIуагъэх, ягу­лъытэ ыкIи яшIэныгъэ ауплъэ­кIугъ. Анахь дэгъоу усакIор зышIэхэрэр къыхэгъэщыгъэнхэмкIэ викторинэ гъэшIэгъонэу «В гости к славному Салтану» зыфиIорэм хагъэлэжьагъэх. Пшысэм къыхэхыгъэ сурэтхэу къарагъэлъэгъухэрэмкIэ герой­хэр къашIэнхэ фэягъ. Литературэ мэфэкIыр кIэлэцIыкIухэм лъэшэу агу рихьыгъ, нэбгырэ 31-рэ ащ хэлэжьагъ, нэужым зэхэтхэу картинэу «Сказки Лу­коморья» зыфиIорэм дэжь щытхэу сурэт зытырарагъэхыгъ.

Дзэукъожь Нуриет.