Лъэпкъ Iэмэ-псымэхэм, зекIохэм, спортым афэ­гъэхьыгъэ зэIукIэгъухэр ныбжьыкIэхэм ашIогъэ­шIэ­гъоных.

Адыгэ Республикэм художественнэ IэпэщысэхэмкIэ, IэшIагъэхэмкIэ иIэпэIасэхэм язэхэт IофшIапIэ игъэмэфэ зэхахьэхэр ыублагъэх. Къыблэ лъэныкъомкIэ Мыекъуапэ идэхьапIэу Нэгыежъ тхыцIэм дэжь (а чIыпIэм нэмыкIэуи еджэх) щыкIогъэ Iофтхьабзэм лъэпкъ IэпэIасэхэр, сурэтышIхэр, спортсменхэр, нэмыкI­хэри хэлэжьагъэх.

Мыекъуапэ икIэлэцIыкIу-ныбжьыкIэ спорт еджапIэу Джэнчэтэ СултIан ыцIэ зыхьырэм зыщы­зыгъэсэрэ гандбол ешIакIохэм Эльвира Ищенкэм пэщэныгъэ адызэрехьэ. СпортымкIэ дунэе класс зиIэ мастерэу Э. Ищенкэр гандбол клубэу «Адыифым» илъэ­сы­бэрэ щешIагъ, хэгъэгум ихэшыпыкIыгъэ ныбжьыкIэ командэ хэтэу дунэе зэIукIэгъухэм ахэлэжьагъ.

Къушъхьэлъапэм щыкIорэ зэ­IукIэгъум кIэлэцIыкIухэм, ныбжьы­кIэхэм япсауныгъэ щагъэпытэ, яспорт ухьазырыныгъэ щыхагъа­хъо. Ащ дакIоу, IэпэIасэхэм яIоф­шIагъэхэм защагъэгъозагъ. Гандбол ешIакIохэу Есения Жидковам, Стефания Пседиян адыгэхэм шэ­кIым, фэшъхьафхэм аха­шIыкIырэ пкъыгъохэр зэрагъэшIагъэх.

Пшъэшъэжъыехэр жьыр нахь зыщыкъэбзэ къушъхьэтхым дэкIоягъэх, республикэм ичIыпIэ дахэ зекIо Iофыгъохэм зэрафытегъэ­псыхьагъэм тегущыIагъэх. Гандбол ешIакIохэри тхыпхъэхэм яшIын чанэу хэлэжьагъэх, А. Жидковам­рэ С. Псердиянрэ лъэпкъ IэпэIасэхэм яшIухьафтынхэр къафагъэ­шъошагъэх. Урысыем исурэтышI­хэм я Союз хэтэу Тыгъужъ Рус­лъанрэ тарихъ шIэныгъэхэмкIэ кандидатэу, этнографэу Теуцожь Нурыетрэ ныбжьыкIэхэм гущы­Iэгъу афэхъугъэх, Iэпэщысэхэм яIэ­шIа­гъэхэм ащагъэгъозагъэх. Лъэпкъ IэпэIасэхэу Абрэдж Гощэфыжь, Теуцожь Фатимэ яIофшIагъэхэу зэхахьэм къыщагъэлъэгъуагъэхэм нэбгырабэ къакIэупчIагъ.

ШIухьафтын пшIын плъэкIыщт пкъыгъохэр, сурэтхэр дахэх. Зе­кIо Iофыгъохэм апылъхэм ахэр ящыкIагъэх. Адыгэ Республикэм ичIыопс хъопсагъоу зэрэщытыр Теуцожь Нурыет узыIэпищэу къы­Iотагъ, зэгъэпшэнхэр ышIыгъэх.

Адыгэ Республикэм культурэмкIэ и Министерствэ, Мыекъуапэ иадминистрацие культурэмкIэ и ГъэIорышIапIэ, кIэлэцIыкIу-ныбжьыкIэ спорт еджапIэу Джэн­чэтэ СултIан ыцIэ зыхьырэм Iофтхьа­бзэм изэхэщэн яIахьышIу хашIы­хьагъ. Лъэпкъым исурэтышIхэр, IэпэIасэхэр IэпыIэгъу къафэхъугъэ­хэм афэразэх, «тхьашъуегъэпсэу» гъэзетымкIи араIожьы ашIоигъу. Зичэзыу зэIукIэгъур нахьышIу зэ­­рэхъущтым яцыхьэ телъэу зэ­хэщэн Iофыгъохэр мы мафэхэм зэрахьэх.