Адыгэ Республикэм и Къэралыгъо филармоние бэрэскэшхом къэ­ралыгъо тынхэр щаратыжьыгъэх. Адыгеим и ЛIышъхьэу КъумпIыл Мурат тынхэр зыфагъэшъошагъэхэм шIуфэс мыщ щарихыгъ, ахэм хьалэлэу Iоф зэрашIэрэм, яIоф зэрэфэшъыпкъэхэм, республикэм ихэхъоныгъэ яIахьышхо зэрэхашIыхьэрэм афэшI зэрафэразэр ща­риIуагъ.

Къэралыгъо мэфэкI шъхьа­Iэхэм зэу ащыщым — Урысыем и Мафэ ехъулIэу къэра­лыгъо тынхэр зэраратыжьырэр республикэм и ЛIы­шъхьэ къыхигъэщыгъ. Тихэгъэгуи респуб­ликэми гъэхъагъэхэр языгъэшIыхэрэр гуетыныгъэшхо фызиIэу Iоф зышIэхэрэр ары.

«Шъощ фэдэ цIыф хъупхъэхэр ары Адыгеим щыIэкIэ-псэу­кIэу илъыр нахьышIу шIыгъэным тегъэпсыхьэгъэ пшъэ­рылъышхо­хэм язэшIохынкIэ кIэ­гъэкъонэу тиIэхэр. Гуеты­ныгъэшхо фы­шъуи­Iэу шъузэрэ­ла­жьэрэм, эко­номикэм, социальнэ лъэныкъом, псауны­гъэм икъэухъумэн, гъэсэныгъэм, культурэм, рэхьатныгъэмрэ фи­тыныгъэмрэ мыукъогъэнхэм шъуиIахьышIу зэрахэшъушIы­хьэрэм афэшI тхьа­шъуегъэпсэу шъосэIо», — къы­Iуагъ КъумпIыл Мурат къэзэ­рэугъоигъэхэм зафигъазэзэ.

Урысые Федерацием и Президент и УказкIэ щытхъуцIэу «Урысые Федерацием изаслуженнэ кIэлэегъадж» зыфиIорэр Шэуджэн районымкIэ Хьа­ты­гъужъыкъое гурыт еджапIэу N 6-м икIэлэегъаджэу Къо­хъужъ Суриет, Теуцожь районымкIэ гурыт еджапIэу N 1-м икIэлэ­егъаджэу Нэныжъ Зуриет, Мые­къопэ гурыт еджапIэу N 15-м икIэлэегъаджэу Лариса Ручкинам афагъэшъошагъ. ЩытхъуцIэу «Урысые Федерацием гъом­лэпхъэшI индустриемкIэ изаслуженнэ IофышI» зыфиIорэр ООО-у «Тамбовскэм» игенеральнэ директор игуадзэу Лъэустэнджэл Ибрахьимэ фа­гъэшъошагъ.

ЩытхъуцIэу «Урысые Федерацием цIыфхэр социальнэу ухъумэгъэнхэмкIэ изаслуженнэ IофышI» зыфиIорэр афагъэ­шъошагъ Адыгэ Республикэм IофшIэнымрэ социальнэ хэхъоныгъэмрэкIэ и Министерствэ иотдел ипащэу Браукъо Вале­рэрэ IофшIэнымкIэ ыкIи цIыфхэр социальнэу ухъумэгъэнхэмкIэ Гупчэм ипащэ игуадзэу Ольга Литвиновамрэ.

ЩытхъуцIэу «Урысые Федерацием связымкIэ ыкIи ин­фор­мациемкIэ изаслуженнэ Iо­фышI» зыфиIорэр фагъэшъошагъ Урысые телевизионнэ, радио хъытыум икъутамэу «Адыгэ Рес­публикэм радиотелевизионнэ къэтынхэмкIэ и Гупчэ» иинженерэу Виктор Спиркиным. ЩытхъуцIэу «Урысые Федерацием изаслуженнэ артист» зы­фиIорэр афагъэшъошагъ А. С. Пушкиным ыцIэкIэ щыт Урыс къэралыгъо драмтеатрэм иартистэу Александр Конюховымрэ Адыгеим лъэпкъ къашъомкIэ и Къэралыгъо академическэ ансамблэу «Налмэсым» ихудожественнэ пащэу Хъоджэе Ас­лъанрэ.

Урысые Федерацием ителевидение цифрэ шапхъэхэм ате­щэгъэным тегъэпсыхьэгъэ про­ектым ипхырыщын иIахьышIу зэрэхишIыхьэрэм фэшI Урысые Федерацием и Президент ирэзэныгъэ тхылъ ратыгъ Адыгэ Республикэм илIыкIоу Крас­нодар краим иадминистрацие ипащэ дэжь щыIэ Александр Наролиным. IэпэIэсэныгъэшхо хэлъэу медицинэ IэпыIэгъур псынкIэу зэраригъэгъотырэм, илъэсыбэ хъугъэу гуетыныгъэ фыриIэу Iоф зэришIэрэм афэшI Урысые Федерацием и Президент ирэзэныгъэ тхылъ фагъэшъошагъ медицинэ IэпыIэгъу псынкIэ ягъэгъотыгъэнымкIэ Адыгэ республикэ станциемрэ катастрофэхэмкIэ медицинэм игупчэрэ яводителэу Гъыщ ­Мурат.

Медалэу «Адыгеим и Щытхъу­зехь» зыфиIорэр афагъэшъо­шагъ гуманитар ушэтынхэмкIэ Адыгэ республикэ институтэу Т. М. КIэращэм ыцIэ зыхьырэм иведущэ научнэ IофышIэу Мамый Руслъан, Урысые общественнэ организациеу «Урысыем ис ермэлхэм я Союз» и Адыгэ шъолъыр къутамэ итхьаматэу Оник Нигоевым, Адыгэ Республикэм цIыфхэм яфитыныгъэхэмкIэ и Уполномоченнэу Анатолий Осокиным.

Джащ фэдэу Адыгеим и ЛIы­шъхьэ Адыгэ республикэ клиникэ сымэджэщым иврач-нев­рологэу ВэкъэшIэ Аслъанрэ Адыгэ республикэ кIэлэцIыкIу клиникэ сымэджэщым ихирургэу Александр Полонскэмрэ псау­ныгъэм икъэухъумэн яIахьышхо зэрэхашIыхьэрэр хигъэунэфыкIыгъ. Ахэм щытхъуцIэу «Адыгэ Республикэм инароднэ врач» зыфиIорэр афагъэшъошагъ.

ЩытхъуцIэу «Адыгэ Респуб­ликэм народнэ гъэсэныгъэмкIэ изаслуженнэ IофышI» зыфиIорэр Адыгэ Республикэм гъэсэныгъэмрэ шIэныгъэмрэкIэ иминистрэу КIэрэщэ Анзаур, щыт­хъуцIэу «Адыгэ Республикэм мэкъу-мэщымкIэ изаслуженнэ IофышI» зыфиIорэр мэкъумэщышIэ-фермер хъызмэтшIапIэу «Аущэдз» ипащэу Хъурмэ Азэмат, Кропоткин край ветеринар лабораторием ипащэу Олег Черных афагъэшъошагъ. Щытхъу­цIэу «Адыгэ Республи­кэм промышленностымкIэ изаслуженнэ IофышI» зыфиIорэр афаусыгъ ПАО-у «Россети Кубань» икъутамэу «Адыгэ элект­рическэ сетьхэм» иэлектромон­терэу Виктор Безнебеевым, ООО-у «Картонтарэм» има­шинистэу Уджыхъу Вячеслав. ЩытхъуцIэу «Адыгэ Республи­кэм изаслуженнэ экономист» зыфиIорэр афагъэшъошагъ ПАО-у «Кубаньэнерго» икъута­­мэу «Адыгэ электрическэ сетьхэм» иотдел ипащэу Ем­щы­къо ФатIимэт, ПАО-у «Ку­бань­энер­го» икъутамэу «Адыгэ электрическэ сетьхэм» иотдел ипащэ игуадзэу Любовь Пав­ловам.

ЩытхъуцIэу «Адыгэ Респуб­ликэм цIыфхэр социальнэу ухъу­мэгъэнхэмкIэ изаслуженнэ IофышI» зыфиIорэр афагъэ­шъошагъ ПФР-м Адыгэ Респуб­ликэмкIэ икъутамэ иотдел ипа­щэу Браукъо Маринэрэ ПФР-м Джэджэ районымкIэ игъэIорышIапIэ ипащэу Елена Гор­деевамрэ. ЩытхъуцIэу «Адыгэ Республикэм искусствэхэмкIэ изаслуженнэ IофышIэшху» зыфиIорэр фагъэшъошагъ ООО-у «Кинокомпаниеу «Черкесия­-фильм» игенеральнэ пащэу Нэ­гъэплъэ Аскэрбый.

ЩытхъуцIэу «Адыгэ Респуб­ликэм изаслуженнэ юрист» зы­фиIорэр афагъэшъошагъ Адыгэ Республикэм и МВД иследственнэ гъэIорышIапIэ иследователь шъхьаIэу Кобл Тимуррэ Адыгэ Республикэм и МВД иследственнэ гъэIорышIапIэ иследователь шъхьаIэу ХьакI­мэфэ Джамбулатрэ. ЩытхъуцIэу «Адыгэ Республикэм изаслуженнэ журналист» зыфи­Iорэр АиФ-Адыгея игенеральнэ директорэу Бзэджэжъыкъо Абрек фагъэшъошагъ.

ПромышленностымкIэ гъэхъа­гъэхэр зэриIэхэм, илъэсыбэ хъу­гъэу гуетыныгъэ фыриIэу Iоф зэришIэрэм афэшI Адыгэ Рес­публикэм и ЛIышъхьэ иунашъо­кIэ рэзэныгъэ тхылъ фагъэшъо­шагъ ЗАО-у «ШпагатышI фаб­рикэу «Майкопскэм» игенеральнэ директорэу ХьакIэмыз Аск­эр.

Тынхэр къызыфагъэшъоша­гъэхэм анаIэ къазэратыригъэтырэм, IэпыIэгъу къазэрафэхъу­рэм афэшI Адыгэ Республикэм и ЛIышъхьэ зэрэфэразэхэр, Адыгеим тапэкIи хэхъоныгъэ егъэшIыгъэным кIуачIэу яIэр рахьылIэным зэрэфэхьазырхэр къаIуагъ.

Iофтхьабзэм икIэух респуб­ликэм ипащэ пстэуми псауныгъэ пытэ яIэнэу, яIофшIэн гъэ­хъэгъакIэхэр щашIынэу къафэлъэIуагъ, Урысыем и МафэкIэ къафэгушIуагъ.