Мы илъэсым псауныгъэр къэухъумэгъэнымкIэ иапэрэ звено гъэпсы­кIакIэ къыфыхэхыгъэным фэгъэхьыгъэ федеральнэ программэм игъэ­цэкIэн Адыгеим щырагъэжьагъ.

Ащ хахьэу 2021— 2025-рэ илъэсхэм ателъытагъэу респуб­ликэм икъоджэ псэупIэхэм Iоф­тхьэбзэ зэфэшъхьафхэр ащыкIонхэу агъэнафэ. Адыгэ Респуб­ликэм поликлиникэхэр, ФАП-хэр, фельдшер-мамыку пунктхэр ащыгъэпсыгъэнхэм ыкIи ащыгъэ­цэкIэжьыгъэнхэм, Iэмэ-псыма­кIэхэм язэгъэгъотын, ащ нэ­мы­кIэу поликлиникэхэм яIофшIэн нахьышIум ылъэныкъокIэ зэхъо­кIыныгъэхэр фэшIыгъэнхэм Iоф­тхьабзэхэр афэгъэхьыгъэщтых.

ЗэрагъэнафэрэмкIэ, илъэ­ситф зытешIэкIэ псауныгъэр къэу­хъу­мэгъэнымкIэ апэрэ звеном иси­стемэ зэхъокIыныгъэ­шхохэр фэхъунхэу ары. ГущыIэм пае, Мыекъуапэ поликлиникакIэу дашIыхьагъэм нэмыкIэу, 2023-рэ илъэсым къутырэу Гавердовскэм жъы хъугъэу дэт ФАП-м ычIыпIэ IэзэпIэ амбулаторие щашIыщт. Джащ фэдэу 2024-рэ илъэсым Мыекъопэ къэлэ поликлиникэу урамэу Чкаловым ыкIи къэлэ поликлиникэу урамэу Первомайскэм атетхэм игъэкIотыгъэ гъэцэ­кIэ­жьынхэр арашIылIэщтых.

Мы уахътэм ехъулIэу Кощ­хьэблэ районым ит къуаджэу Блащэпсынэ IэзэпIэ амбулаторие, къуаджэу Еленовскэм —фельдшер-мамыку пункт, Джэ­джэ район гупчэ сымэджэщым епхыгъэу кIэлэцIыкIу IэзэпIэ от­деление ащашIых. Ащ нэмыкIэу Шэуджэн ыкIи Красногвардейскэ район сымэ­джэщхэм игъэкIотыгъэ гъэцэ­кIэжьынхэр ащэкIох. Мы ма­фэхэм «Лада Грант» зыфиIорэ автомобили 9 Мыекъопэ, Шэуджэн ыкIи Кощ­хьэблэ районхэм яIэзэпIэ учреждениехэм аIэкIагъэхьащтых.

Джащ фэдэу сомэ миллион 30-м ехъу зыосэ Iэмэ-псыма­кIэхэр Красногвардейскэ гупчэ сымэджэщым ыкIи К. М. Батмэным ыцIэ зыхьырэ Адыгэ межрайоннэ сымэджэщым афа­щэфын гухэлъ яI.