Анахь дэгъухэр къыхагъэщыгъэх
УФ-м ПенсиехэмкIэ ифонд и Къутамэу АР-м щыIэм социальнэ IофышIэм и Мафэ фэгъэхьыгъэ Iофтхьабзэу щыкIуагъэм хэлэжьагъ республикэ Парламентым и Тхьаматэу Владимир Нарожнэр.
ПенсиехэмкIэ фондым ичIыпIэ органхэм Iофэу ашIэрэм мэхьанэшхо зэриIэм кIигъэтхъызэ мэфэкIымкIэ ар къафэгушIуагъ.
— Фондым и Къутамэу АР-м щыIэм профессионализмэгъэ ин зыхэлъ специалистхэм Iоф щашIэ, — къыIуагъ Владимир Нарожнэм. — ЦIыфэу къышъоуалIэрэ пэпчъ иупчIэ иджэуап зэригъотырэм, ищыкIэгъэ IэпыIэгъур икъоу ыкIи игъом зэрешъутырэм сицыхьэ телъ.
Нэужым Къутамэм иIофышIэу Парламентым инаградэхэмкIэ къыхагъэщыгъэхэм ахэр аритыжьыгъэх.
АР-м пенсиехэмкIэ исистемэ изегъэушъомбгъун илъэсыбэ хъугъэу яIахьышхо зэрэхалъхьэрэм фэшI Къэралыгъо Советым — Хасэм ирэзэныгъэ тхылъхэр къафагъэшъошагъэх Къутамэм ипащэ игуадзэу Цуамыкъо Радмилэ, ибухгалтер шъхьаIэу Мэрэтыкъо Шыгъотыжь, страхование зышIыгъэхэм пенсиехэмкIэ фитыныгъэу яIэм уасэ фэзышIырэ отделым ипащэу Наталья Третьяковам.
Джащ фэдэу УФ-м ПенсиехэмкIэ ифонд загъэпсыгъэр илъэс 30 зэрэхъугъэм фэгъэхьыгъэ нэпэеплъ тамыгъэхэмкIэ къыхагъэщыгъэх илъэсыбэрэ ащ ипэщагъэу Къулэ Аскэрбый, фондым и ГъэIорышIапIэу Шэуджэн районым щыIэм ипащэу Хьаткъо Казбек, Къутамэм ихъарзынэщ иIофышIэу Дэгумыкъо Валентинэ, специалистэкспертхэу Маргарита Татосян ыкIи Тамара Тарасовар.
УФ-м ПенсиехэмкIэ ифонд и Къутамэу АР-м щыIэм ипресс-къулыкъу