Тыгъуасэ партием и Адыгэ шъолъыр къутамэ ия ХХХIII-рэ конференциеу щыIагъэм Урысые политикэ партиеу «Единэ Россием» ия ХХ-рэ Зэфэс республикэм ыцIэкIэ хэлэжьэщтхэр щыхадзыгъэх. Мэкъуогъум и 19-м къалэу Москва Зэфэсыр щыкIощт.

Iофыгъо шъхьаIэу зытегущыIэщтхэр — партием апшъэрэ мэхьанэ зиIэ пшъэрылъэу ыпашъхьэ итхэр гъэнэфэгъэнхэр, джащ фэдэу ащ и Устав зэхъокIыныгъэхэмрэ хэгъэ­хъоныгъэхэмрэ фэшIыгъэнхэр ары. Уставым къызэрэдилъытэрэм тетэу, Адыгеим и ЛIышъхьэу КъумпIыл Мурат «Единэ Россием» и Апшъэрэ совет зэрэхэтым къыхэкIэу Зэфэсым хэлэжьэщт лIыкIохэм ахагъэ­хьагъ. Партием и Генеральнэ совет хэтэу, къалэу МыекъуапэкIэ гурыт еджапIэу N 10-м ипащэу Людмила Кузнецовари Зэфэсэу щыIэщтым иделегатэу хъугъэ.

Партийнэ конференциер кIо зэ­хъум Адыгэ шъолъыр къутамэм хэтхэм республикэм ыцIэкIэ нэ­бгы­рэ пчъагъэу агъэкIощтымкIэ шап­хъэхэм къапкъырыкIыхэзэ, етIани нэбгыритIу лIыкIоу хадзыгъ. Шъхьэи­хыгъэ мэкъэтыным тетэу джащ фэ­дэу лIыкIохэм ахэхьагъэх Адыгэ Республикэм и Къэралыгъо Совет — Хасэм и Тхьаматэу, рес­пуб­ликэ парламентым хэхьэрэ еди­нороссхэм яфракцие ипащэу Владимир Нарожнэр, Адыгэ Республикэм и Къэралыгъо Совет — Хасэм и Тхьаматэ игуадзэу, партием и Тхьа­матэ ирес­публикэ общественнэ приемнэ ипащэу Шъэо Аскэр. Адыге­им и ЛIышъхьэу КъумпIыл Мурат конференцием хэлажьэхэрэм за­къыфигъазэзэ хигъэунэфыкIыгъ хэ­дзакIохэм яшIоигъоныгъэхэр зэрагъэшIэнхэм пае нахьыбэрэ аIукIэнхэ, щыIэныгъэм къыпкъырыкIырэ Iофтхьабзэу цIыфхэм яфэныкъоныгъэхэм, яшIоигъоныгъэхэм икъоу адиштэхэрэр зэрахьанхэ зэрэфаер.

«Гухэлъ инхэм игъорыгъозэ уафэкIон фае. Тэ къытщэгугъых осэ тэрэз цIыфхэм къызэратыщт, шIуа­гъэ къэзыхьыщт IофшIэныр дгъэцэкIэнэу», — къыIуагъ КъумпIыл Мурат.

Адыгэ Республикэм и ЛIышъхьэ ипресс-къулыкъу