Граждан обществэм хэхъоныгъэ ышIынымкIэ ыкIи цIыфым ифи­тыныгъэхэмкIэ УФ-м и Президент дэжь щызэхащэгъэ Советым хэтэу, Ассоциациеу «Независимый общественный мониторинг» зыфиIорэм итхьаматэу Александр Брод Адыгэ Республикэм икъэ­барлъыгъэIэс амалхэм ялIыкIохэм зэIукIэгъу адыриIагъ.

Iофтхьабзэр зыфэгъэхьыгъагъэр бжыхьэм щыIэщт хэ­дзынхэр зэрэзэшIуахыщтхэр ары.

Ащ хэлэжьагъэх Урысыем IофшIэнымкIэ и ЛIыхъужъэу, УФ-м и Общественнэ палатэ хэтэу, Адыгеим, Къэбэр­тэе-Бэлъкъарым, Къэрэщэе-­Щэр­джэсым янароднэ тхакIоу МэщбэшIэ Исхьакъ, Адыгеим и ЛIышъхьэ ыкIи АР-м иминистрэхэм я Кабинет я Администрацие ипащэу Владимир Свеженец, АР-м и Общественнэ палатэ итхьаматэу Устэ Руслъан.

ЗэIукIэгъур пэублэ псалъэ­кIэ Устэ Руслъан къызэIуихызэ, тызхэт илъэсым иIоныгъо мазэ щыIэщт хэдзынхэм Адыгеим зызэрафигъэ­хьазырырэр къыхигъэщыгъ.

— Зыми емыпхыгъэ экспертхэм якупэу хэдзын кампаниер зэрэкIорэм лъып­лъэщтхэм ыкIи цIыфхэм къэ­барыр алъызыгъэIэсыщтхэм яегъэджэн Общественнэ палатэм пшъэрылъэу иIэхэм ащыщ, — къыIуагъ ащ. — Ащ фэдэ нэбгырэ 520-рэ едгъэ­джагъ.

ГущыIэр лъигъэкIотагъ Ас­социацием итхьаматэ.

— Адыгеим апэрэп сыкъы­зэрэкIорэр, зэпхыныгъэ дэгъу тиIэу тызэдэлажьэ. Къэблэгъэрэ хэдзынхэр къэралы­гъом ихэбзэгъэуцугъэ диштэу зэхэщэгъэнхэм, цIыфхэм яфи­тыныгъэхэр къэухъумэгъэнхэм мэхьанэшхо яI. Хэз­гъэунэфыкIымэ сшIоигъу хэ­бзэгъэуцугъэм диштэу Общественнэ палатэм зыми емыпхыгъэ лъыплъакIохэр хэ­дзынхэм ыгъэкIонхэ фит зэ­рэхъугъэр. Статистикэм къы­зэригъэлъагъорэмкIэ, цIыф­хэм ахэм нахь цыхьэ афашIы ыкIи 2018-рэ илъэсым къыщегъэжьагъэу лъыплъакIохэм дэгъоу зыкъагъэ­лъэгъуагъ,— къыIуагъ А. Брод.

Зыми емыпхыгъэ Ассоциацием итхьаматэ къызтегущыIагъэхэм ащыщ шIыкIакIэу хэдзынхэр зэрэзэхащэхэрэр: электроннэ ыкIи Iудзыгъэ мэкъэтыныр, зы мафэм ычIы­пIэкIэ мэфищ мэкъэтыныр, нэмыкIхэри. Джащ фэдэу, хэдзынхэмкIэ кампанием хэ­лэжьэнхэмкIэ журналистхэм фитыныгъэу яIэхэм Александр Брод къэзэрэугъои­гъэхэр ащигъэгъозагъэх.

Iофтхьабзэм икIэух журналистхэм яупчIэхэм А. Брод джэуапхэр къаритыжьыгъ.

Хэдзынхэр шапхъэхэм адиштэу, шъыпкъагъэ хэлъэу зэхэщэгъэнхэм лъэныкъо пстэу­ри зэрэдэлэжьэщтхэр зэIукIэгъум къыщыха­гъэщыгъ.

Iэшъынэ Сусан.