Мы аужырэ илъэситIум зэпахырэ узэу коронавирусым зэрэдунаеу зэрэзэлъиштагъэм цIыфхэр гумэкI хидзагъэх. Уз щынагъор къапыхьаным щыщынэхэзэ ар зыгъэхъужьын уцым, вакцинэу къаугупшысыгъэм бэхэр ежагъэх. Мы мафэхэм зэкIэ фаехэм вакцинэр ыпкIэ хэмылъэу зыхырагъэлъхьан алъэкIы.

Коронавирусыр къызэузыхэрэм япчъагъэ нахь макIэ хъугъэ нахь мы­шIэми, мы уз щынагъом зыщыуухъу­мэным фэшI пэшIорыгъэшъ Iофтхьа­бзэхэр зепхьанхэ фае. О уимызакъоу, къыппэблагъэхэми ящыIэныгъэ къэуухъу­мэным пае вакцинэр зыхябгъэлъхьан фаеу специалистхэм къаIо.

Ау вакцинэм фэгъэхьыгъэу цIыфхэр зэнэкъокъу хэтых, нахьыбэхэр прививкэм щэщынэх. Медицинэм иIофышIэхэм къызэраIорэмкIэ, пандемием илъэхъан прививкэр зямыгъэшIыкIэ узыр къыппыхьаным ищынагъо щыIэу ары.

Вакцинацием еплъыкIэу фыряIэм тыщагъэгъозагъ Адыгэ Республикэм ыкIи Пшызэ шъолъыр ащыпсэурэ быслъы­мэнхэм я ДиндэлэжьапIэ имуфтиеу Къэрдэнэ Аскэрбыйрэ Мыекъопэ ыкIи Адыгэ епархием яепископэу Тихонрэ.

Къэрдэнэ Аскэрбый: — Тыгъуасэ АР-м и ДиндэлэжьапIэ игъэкIотыгъэ зэхэсыгъоу щыIагъэм зэпахырэ узым пэшIуекIорэ вакцинацием ишIын тыщытегущыIагъ. Узыр зэпамыхыным фэшI мы мафэхэм зэрэ Урысыеу вакцинэр цIыфхэм ащыхалъхьэ. Тэри Адыгэ Республикэм ыкIи Пшызэ шъолъыр иIимамхэм тыкъяджагъ мэщытым нэмазышI къа­кIохэрэр Iофым изытет щагъэгъозэнхэу, япсауныгъэ ыкIи къапэблэгъэ цIыфхэм ящыIэныгъэ къаухъумэным фэшI прививкэ арагъэшIын зэрэфаер агурагъэIонэу. Ащ нэмыкIэу, вакцинэр зыхарамыгъалъхьэу хьаджэшI зэ­рамыгъэкIощтхэр агурыдгъэIуагъ. Зэпахырэ узым зимыушъомбгъунымкIэ апэу Iофыгъохэр зезыхьагъэхэм ащыщ Адыгэ Республикэм ыкIи Пшызэ шъолъыр ащыпсэурэ быслъы­мэнхэм я ДиндэлэжьапIэ. Гъунэпкъэ гъэ­нэфагъэхэр къызагъэуцухэм, мэщытхэр зэфэшIыгъагъэх, зидунай зы­хъожьыгъэхэ гупсэхэр зэрищыкIагъэу цIыфхэм агъэтIылъыжьышъугъэ­хэп. Ащыгъум псауныгъэр къэухъу­мэгъэнымкIэ Министерствэм иIофы­шIэхэр къедгъэблагъэхэзэ узыгъэгъо­зэрэ Iофтхьабзэхэр зетхьагъэх.

Адыгэ Республикэм ыкIи Пшызэ шъолъыр ащыпсэурэ быслъымэнхэм я ДиндэлэжьапIэ цIыфхэм закъыфегъазэ, мы уз щынагъом пэшIуекIонхэм фэшI вакцинэр зыхырагъэлъхьанэу, ежьхэми яIахьылхэми ящы­Iэныгъэ къаухъумэнэу.

Тихон: — Псауныгъэр цIыфым Тхьэм къы­репэсы. Нэбгырэ пэпчъ ипсауныгъэ ежь къыухъумэн фае. Джащ фэдэу врачым ипшъэрылъ шъхьаI цIыфым ипсауныгъэ лъыплъэныр. Ахэм сэ шIошъхъуныгъэ афысиI ыкIи къаIохэрэм сицыхьэ ателъ.

Вакцинэр зыхягъэлъхьэгъэным иIо­фыгъо нэбгырэ пэпчъ екIолIэкIэ гъэ­нэфагъэ фыриIэн ылъэкIыщт. Специалистхэм зэралъытэрэмкIэ, вакцинэр цIыфхэм къашъхьапэу ары. Чылысым ылъэныкъокIэ угущыIэн хъумэ, цIыфым иакъыл, игупшысэ къэбгъэущы­нэу щыт. Тарихъым урыплъэжьымэ, зэпахырэ узхэм бэхэр арылIыкIыгъэх, ащыгъум вакцинэ ашIын, медицинэ IэпыIэгъур зэрагъэгъотын амал яIагъэп. Арышъ, цIыф пэпчъ мы Iофым ишъыпкъэу къекIолIэн фае. Сэ зэрэслъытэрэмкIэ, апэрапшIэ врачым зы­фагъэзэнышъ, япсауныгъэ изытет ауплъэкIун, ащ Iизын къызэраритыгъэм тетэу вакцинэр зыхалъхьан фае.