Урысыем изыкIыныгъэ фэIорышIэщт
Мэкъуогъум и 12-м чэщым сыхьатыр 12-м Урысые къэралыгъо телерадиокомпанием зыфэдэ къэмыхъугъэ ипроектэу Урысыем и Мафэ фэгъэхьыгъэу «Широка страна моя родная!» зыфиIорэр мультимедийнэ онлайн-гъэлъэгъуапIэу «SMOTRIM.RU» зыцIэм къыщитыщт. Телерадиокомпаниеу «Адыгеир» ащ хэлэжьэщт.
Телемарафоным ипшъэрылъ шъхьаIэр — къэралыгъом щыпсэухэрэм Урысыер шIыкIакIэкIэ ягъэлъэгъугъэныр, чIыпIакIэхэр, чIыопсымрэ культурэмрэ ясаугъэтхэу амышIэщтыгъэхэр къафызэIухыгъэнхэр ары. Евразийскэ чIынэлъэшхом лIэшIэгъу мин пчъагъэрэ лIэужыбэмэ щытхъу хэлъэу щызэшIуахы-
гъэхэмкIэ, ятэхэм лIыгъэу ахэлъыр ящысэу къэралыгъом шIулъэгъоу, шъыпкъэныгъэу фыряIэмкIэ ушъэгъэ тарихъ щаугъоигъ. Мэкъуогъум и 12-м, Урысыем и Мафэ тефэу, къэралыгъо телевидением джынэс щамыгъэхьазырыгъэ телемарафонышхоу щыкIощтым чIыпIэ зэфэшъхьафхэр ятарихъкIэ, географиемкIэ, ягушъхьэбаиныгъэкIэ, культурнэ кIэнэу яIэмкIэ, зекIо чIыпIэ хьалэмэтхэмкIэ зэрипхыщтых. Журналистхэм, операторхэм, зещакIохэм, режиссерхэм шъолъыр зэфэшъхьафхэм ащыпсэухэрэм амал аратыщт къэралыгъом ицIыфхэм зыкIыныгъэу ахэлъыр зэхарагъэшIэнэу.
Урысые къэралыгъо телерадиокомпанием икъутамэхэу шъолъырхэм ащылажьэхэрэм акIуачIэкIэ аугъоирэ къэбархэр нэужым Урысыем, ащ щыпсэурэ лъэпкъыбэм яхьылIэгъэ фильмхэм, очеркхэм, репортажхэм алъапсэ хъушъущтых.
Сыхьат 24-рэ кIощт марафоным федеральнэ округи 8-ри хэлэжьэщт ыкIи къэралыгъом ишъолъыр 80-м ехъу зэрипхыщт. Телевизионнэ зекIошхор анахьэу къызщыуцущтхэм ащыщых Калининград, Тулэ, Краснодар, Ставрополь, Нижний Новгород, Челябинск, Новосибирск ыкIи Владивосток. Урысые телемарафоным зэрипхыщтхэм ягупчэу щытыщтыр Къэралыгъо телерадиокомпаниеу «Самара». Телерадиокомпанием истудие исхэм ягъусэхэу къэралыгъом щыпсэухэрэр урыс первопроходцэхэм ягъогу техьащтых — тыгъэкъокIыпIэм щегъэжьагъэу тыгъэкъохьапIэм нэс, «къухьэм игъэзалъэ» шъолъырхэм ащылэжьэрэ яIофшIэгъухэм афагъэшъуашэзэ. Телерадиокомпаниеу «Адыгеим» иIофышIэхэми ар къаратыщт — тиреспубликэ щыпсэурэ лъэпкъыбэм, тишъолъыр итарихъ, ицIыфхэм, ичIыпIэ гъэшIэгъонхэм, щагъэлъэпIэрэ пкъыгъохэу, шхынхэу Адыгеир къызэрашIэжьхэрэм афэгъэхьыгъэу къаIотэщт.
Зыфэдэ къэмыхъугъэ «зекIоным» шIоигъоныгъэ зиIэ пстэури хэлэжьэшъущт. ЗанкIэу ащ узщеплъын плъэкIыщтхэр:
урысые мультимедийнэ онлайн-гъэлъэгъуапIэу «SMOTRIM.RU/STRANA», мобильнэ псэуалъэхэмкIэ (официальнэ приложениехэу Android ыкIи iOS), Урысые телерадиокомпанием икъутамэхэм, иинтернет къэкIуапIэхэм зэкIэми.