БлэкIыгъэ илъэсхэм хьисапыр тIоу гощыгъэу аты­щтыгъ — базовэр ыкIи профильнэр. Мыгъэ зы ушэтынэу хьисапыр кIуагъэ.

А предметыр нахь куоу зэзыгъа­шIэхэрэм, апшъэрэ еджапIэм чIа­хьэхэ хъумэ зищыкIэгъэщтхэм профильнэ хьисапыр блыпэ мафэм атыгъ.

Ушэтыным АдыгеимкIэ нэбгырэ 787-рэ хэлэжьагъ, ахэм апае экзамен IыхыпIи 9 зэтырагъэпсы­хьэгъагъ.

Материалхэм Iоф зыщадашIэрэ Гупчэм ипащэу Артем Журавель къызэриIуагъэмкIэ, ушэтыным хэлэжьэнхэу нэбгырэ 816-мэ зыкъагъэлъэгъогъагъ, ау нэбгырэ 29-рэ къекIолIагъэп. Профильнэ хьисапыр шIокI имыIэу птынэу щытмэ ащыщэп, арышъ, кIэгъожьыгъэхэр къы­хэкIыгъэх. КъемыкIолIагъэхэм янахьыбэр блэкIыгъэ илъэсхэм еджапIэхэр къэзыухыгъэх.

Ушэтыныр сыхьати 3-рэ такъикъ 55-рэ кIуагъэ. Ащ хэлэжьагъэхэм линейкэхэу чертежхэр зэрашIыщтыр ары ныIэп агъэфедэнэу щытыгъэр.

Мыекъопэ лицееу N 19-м нэ­бгырабэмэ ушэтыныр щатыгъ. ЕджэпIиплIымэ къарыкIыгъэхэм мыщ ушэтыныр щакIугъ. КIэлэеджа­кIохэм къахьыгъэ оценкэхэр мэ­къуогъум и 23-м блэмыкIэу къараIожьыщтых. КъэкIорэ ушэтыныр мэкъуогъум и 11 атыщт. Физикэмрэ тарихъымрэ атынхэу къыхэзы­хыгъэхэр ащ хэлэжьэщтых.

Сихъу Гощнагъу.