Унэ, фэтэр мин 16,8-мэ газыр аращэщт
Адыгеим и ЛIышъхьэу, Урысые политикэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат Петербург щыкIорэ Дунэе экономическэ форумым къыдыхэлъытагъэу партием истратегическэ сессиеу инфраструктурэ проектхэр шъолъырхэм зэращапхыращыщтхэм афэгъэхьыгъагъэм тыгъуасэ хэлэжьагъ.
Шъугу къэтэгъэкIыжьы Урысые Федерацием и Президентэу Владимир Путиным шъолъырхэм хэхъоныгъэ зэрашIыщт шIыкIакIэр Джэпсалъэм игъо къызэращыфилъэгъугъэр. Ар зыфэгъэхьыгъэр проценти 3-м ехъу зытемыхъорэ инфраструктурэ бюджет чIыфэхэу илъэс 15-кIэ зытырагъэкIыжьын алъэкIыщтхэр ары.
«Единэ Россием» и Генеральнэ совет и Секретарэу Андрей Турчак зэрэхигъэунэфыкIыгъэмкIэ, партиеу «Единэ Россиер» шъолъырхэм IэпыIэгъу афэхъущт инфраструктурэ чIыфэхэмкIэ заявкэхэр гъэхьазырыгъэнхэмкIэ. Джащ фэдэу «Единэ Россием» и Генеральнэ совет исекретарь къызэриIуагъэмкIэ, ыпкIэ хэмылъэу газыр зэращэлIэщт унэхэм яадресхэр партием ыгъэнэфэщтых. Владимир Путиным партием мы ипредложение къыдыригъэштагъ ыкIи министрэхэм я Кабинет пшъэрылъ фишIыгъ 2023-рэ илъэсым нэс амал зиIэ чIыпIэхэм ыпкIэ хэмылъэу газыр аращэлIэнэу.
«Адыгеим ичIыпIэхэм газрыкIуапIэхэр дэгъоу арыщагъэх, республикэм бэшIагъэ «Газпромым» зэдэлэжьэныгъэ зыдыриIэр. Ащ кIэухышIухэри къетых — республикэм хэхъоныгъэ егъэшIыгъэнымкIэ, инвестициехэр нахьыбэу къыхалъхьанхэмкIэ энергие къэкIуапIэхэр нахьыбэ зэрэхъухэрэм имызакъоу, цIыфхэм ящыIэкIэ-псэукIи зыкъетэгъэIэты. Республикэм ичIыпIэ анахь пэIудзыгъэхэми газыр къякIуалIэ. Джыдэдэм тапашъхьэ пшъэрылъэу итыр цIыфхэм яунэхэм газыр алъыгъэIэсыгъэнымкIэ УФ-м и Президент пшъэрылъэу ышIыгъэр гъэцэкIэгъэныр ары. МыщкIэ «Газпромымрэ» «Единэ Россиемрэ» зэдэлэжьэныгъэшIу адытиIэщт. Партием стратегическэ сессиеу непэ иIагъэм а Iофыгъохэр ары тызыщыхэплъагъэхэр», — къыIуагъ Адыгеим и ЛIышъхьэу КъумпIыл Мурат.
ПАО-у «Газпромым» къызэритыгъэмкIэ, унэ, фэтэр мин 16,8-рэ фэдизмэ непэ газыр ящэлIэгъэн, унэ мини 7,8-рэ газым пышIэгъэнхэм пае газ сетьхэр гъэпсыгъэнхэ фае. А гухэлъхэм сомэ миллиарди 4-рэ миллион 875-рэ апэIухьанэу къырадзэ.
Партиеу «Единэ Россием» истратегическэ сессие АР-м и ЛIышъхьэу КъумпIыл Муратрэ ООО-у «Газпром межрегионгаз» зыфиIорэм игенеральнэ директорэу Сергей Густовымрэ УФ-м и Президент къыгъэуцугъэ пшъэрылъхэм ягъэцэкIэнкIэ зэрэзэдэлэжьэщтхэ шIыкIэм щытегущыIагъэх.