Адыгэ Республикэм и ЛIышъхьэу КъумпIыл Мурат Петербург щыкIорэ Дунэе экономическэ форумым компаниеу SFT Group зыфиIорэм идиректорхэм я Совет итхьаматэу Анатолий Штейнберг, мы компанием ипащэу Евгений Глезман, ООО-у «Картонтарэм» игъэцэкIэкIо пащэу Сергей Погодиным, компанием июридическэ де­партамент идиректорэу Анатолий Сафроновым тыгъуасэ зэдэгущыIэгъу щадыриIагъ.

АР-м и Премьер-министрэ игуадзэу, АР-м иофициальнэ лIыкIоу УФ-м и Президент дэжь щыIэ ТхьакIущынэ Мурат, АР-м экономикэ хэхъоныгъэмрэ сатыумрэкIэ иминистрэу Шэуджэн Заур мы Iофтхьабзэм хэлэжьагъэх.

Компаниеу SFT Group иинвестиционнэ проектитIумэ ягъэ­цэкIэнкIэ амалэу щыIэхэм ате­гущыIагъэх. ГущыIэр зыфэгъэ­хьыгъагъэр ролевой картонрэ тхьапэрэ къыдэзыгъэкIыщт пред­приятие зэрэзэхащэщтымрэ гофрозавод зэрагъэпсыщтымрэ ары. Апэрэ предприятиер Мыекъуапэ къыщызэIуа­хынэу рахъухьэ. Ар зыщагъэ­псыщт чIыпIэр агъэнэфэгъах, проектым ибизнес-план икъы­хэхын джыдэдэм Iоф дашIэ. Сомэ миллиард 15 фэдиз хъурэ инвестициехэр ащ халъхьанхэу къырадзэ. Предприятием IофшIэпIэ чIыпIи 120-м нэс щызэхащэщт.

Гофрозаводым игъэпсын епхыгъэ нэмыкI проектым хаплъэхэ зэхъум тапэкIэ Адыгеим ихэбзэ къулыкъухэм игъо алъэгъугъагъ Тэхъутэмыкъое районым щагъэпсырэ промышленнэ паркым ар щашIынэу. Зигугъу къэтшIыгъэ компанием ащ ехьыщыр предприятиякIэр 2030-рэ илъэсым нэс рес­публикэм щигъэпсынэу рехъу­хьэ. ПстэумкIи сомэ миллиарди 5 фэдиз хъурэ инвестициехэр ащ пэIуагъэхьащтых. Илъэсым къыкIоцI гофрэ квадрат метрэ миллион 200-м нэс заводым къыщыдагъэкIыщт, IофшIэпIэ чIыпIэ 280-рэ фэдиз щызэхащэщт.

Зигугъу къашIыгъэ проектхэм ягъэцэкIэн яфедэ зэрэхэлъыр лъэныкъохэм форумым къы­щаIуагъ. Пандемием емылъыты­гъэу инвесторхэм гухэлъ яI, производствэм нахь зы­ра­гъэу­шъомбгъунэу. Инвестициехэр къыхалъхьанхэмкIэ Адыгеим ама­лышIухэр иIэхэу ахэм алъ­ытэ.

Инвесторхэм тиреспубликэ къыхахынэу зыкIэхъугъэр шъо­лъырым инвестиционнэ политикэ дэгъу зэрэщызэрахьэрэр, инфраструктурэр зэрэщагъэ­псырэр, заводыр зыщашIыщт чIыпIэр Iэрыфэгъоу зэрэщытыр ары.

Компаниеу SFT Group илIыкIохэм зэрэхагъэунэфыкIы­гъэмкIэ, чIыпIэр къыхахы зэ­хъум республикэм ипредприятиеу ООО-у «Картонтарэм» гъэхъагъэу иIэхэри къыдалъытагъэх. ТхылъыпIэмрэ картонымрэ якъыдэгъэкIынкIэ Урысыем и Къыблэ ит предприятие пэрытхэм ар ащыщ, экологие шапхъэхэр къыдилъытэзэ, производствэр джырэ шап­хъэ­хэм адиштэу ащ егъэкIэжьы.

Адыгеим и ЛIышъхьэ про­ектэу зыхэплъагъэхэм мэхьа­нэ­шхо зэряIэр, гъусэныгъэ зыдыряIэ компанием ицыхьэ ателъ зэрэхъущтыр хигъэунэ­фы­кIыгъ. Компаниеу SFT Group предприятиеу щыIэхэр джырэ уахътэм диштэу зэрэзэтыригъэ­псыхьажьыхэрэм нэмыкIэу, предприятиякIэхэри ыгъэпсынхэу, IофшIэпIэ чIыпIакIэхэр зэхищэнхэу гухэлъ иI. Бизнесым социальнэ пшъэрылъышхо зэ­рэзэшIуихырэр, мыщкIэ ООО-у «Картонтарэм» Iофышхо зэригъэцакIэрэр КъумпIыл Мурат шъхьафэу хигъэунэфыкIыгъ.

Дунэе экономическэ форумым фэгъэхьыгъэ къэбархэр АР-м и ЛIышъхьэ ипресс-къулыкъу къыгъэхьазырыгъэх.