Мэкъуогъум и 1-м республикэм щыIэгъэ ощхышхом ыпкъ къикIэу Мыекъопэ ыкIи Джэ­джэ районхэм япсэупIи 3-мэ ящагу 54-мэ, яунэ 12-мэ псыр арыхьагъ. Мы уахътэм ощхым къыздихьыгъэ гумэкIыгъохэм ядэгъэзыжьын ыуж итых. Джащ фэдэу, Iофым изытет зэрэкIорэм Адыгеим и ЛIы­шъхьэу КъумпIыл Мурат ышъхьэ­кIэ лъэплъэ, ощхым зиунэгъо мылъку зэрар зэрихыгъэхэм ящыкIэгъэ IэпыIэгъур зэрара­гъэгъотыщтыр ащ хигъэунэ­фыкIыгъ.

Мыекъопэ ыкIи Джэджэ районхэм ошIэ-дэмышIэ Iофхэр къэмыгъэхъугъэнхэмкIэ ыкIи ахэр дэгъэзыжьыгъэнхэмкIэ якомиссии 4-мэ псыр зыкIэ- огъэ унэхэр къаплъыхьэх, чIэнагъэу ашIыгъэр агъэунэфы.

Урысыем ошIэ-дэмышIэ Iоф­хэмкIэ и Министерствэ и Гъэ­IорышIэпIэ шъхьаIу АР-м щыIэм ипресс-къулыкъу къызэритыгъэмкIэ, зэкIэ унэхэм ыкIи щагухэм псыр адащыгъ. Ощхым къыздихьыгъэ гумэкIыгъохэм ядэгъэзыжьын ошIэ-дэмышIэ IофхэмкIэ къулыкъум иIофышIэ нэбгырэ 70-м ехъу ыкIи техникэ 21-рэ хэлажьэ.

Псыхъоу Фарзэ телъ лъэмыджхэм ачIэгъхэр гъогу къулыкъу бригадищмэ агъэкъабзэх.

Iэшъынэ Сусан.