КIэлэцIыкIухэр къэухъумэгъэнхэм и Дунэе мафэ сабыигъом имэфэкI дах, нахьыжъхэр сабыйхэм зэралъэкIэу апылъынхэ зэ­рэфаер, цIыф цIыкIум къешIэкIыгъэ Iофыгъуабэм нахь гъунэ алъафэу, мэхьанэ аратэу щытынхэр кIегъэтхъы.

Мэкъуогъум и 1-м Гавердовскэм дэт чIыпIэ тхылъеджапIэу N 10-м, хабзэ зэрэхъугъэу, кIэ­лэцIыкIухэм якъэухъумэн и Дунэе мафэ игъэкIо­тыгъэу щыхагъэунэфы­кIыгъ. ТхылъеджэкIо цIыкIухэм апае МБОУ N 18-м иIофышIэхэм пчъагъэу зэхэт джэгукIэ программэу «Наши дети — замир на планете» зыфи­Iорэр къагъэхьазырыгъагъ. Библиотекарыр мэфэкIым хэлэжьэрэ ­кIэлэцIыкIухэм къафэгушIуагъ, кIэкIэу, IупкIэу мы мафэр хагъэунэ­фыкIыгъэным къежьапIэ фэхъугъэр къафиIотагъ. МэфэкI пэпчъ чэфыгъи, гушIуагъуи, джэгукIэ зэ­фэшъхьафхэри хэтых. ТхылъеджапIэм иIофышIэу Френкен Бок кIэ­лэцIыкIухэм литературэ викторинэу «Парад любимых литературных героев» зыфиIорэр афызэхищагъ, литературэм ыкIи пшы­сэхэм ахэт геройхэр зэра­шIэхэрэр, тхылъхэр зи­­кIасэхэр ащ къыгъэлъэ­гъуагъ.

КIэлэцIыкIухэр ягуапэу мэфэкI Iофтхьэбзэ зэ­фэшъхьафхэм — джэгукIэхэм, сэмэркъэу зэ­нэкъокъухэм, виктори­нэ­хэм ахэлэжьагъэх. Еджа­кIохэм ахэлъ сэнаущыгъэр сурэтшIын зэнэкъо­къум къыщынэфагъ: зыхэм — сурэтым иунагъо къыщигъэлъэгъуагъ, адрэм — икIэсэ псэушъхьэхэм ащыщхэр, ящэнэрэм — гъэмэфэ чIыопсым итеп­лъэ, нэмыкIхэри.

Сабыигъом имэфэкI чэ­фыгъэ, фэбэгъэ ин хэлъэу кIуагъэ, хэлэжьагъэ пэпчъ агуи ашъуи хэ­хъуагъ, нэбгырэ 30-м зэ­фэдэу шIу­хьафтынхэр ара­тыгъэх, дахэу загъэпсэфыгъ.

(Тикорр.).