ЦIыфхэм яшIоигъоныгъэхэр зэгъэшIэгъэнхэмкIэ пэшIорыгъэшъ мэкъэ­тыныр амалышIоу щыт. Нэкъокъоным темыщыныхьэу партиехэмкIэ «Единэ Россие» закъор ары ащ фэдэ шъхьэихыгъэ Iофтхьэбзэшхор зэхэзыщэрэр.

Президентэу Владимир Путиным партием ипащэхэмрэ пэшIорыгъэшъ мэкъэтыным щы­текIогъэ общественникхэмрэ зэIукIэгъоу адыриIагъэм ащ фэгъэхьыгъэу къыщиIуагъ.

«ЦIыфхэм шъхьэихыгъэу адэгущыIэным партием щиу­хьэрэп. Ахэм яупчIыжьыным, игъоу алъэгъухэрэмкIэ адыригъэштэным, щыкIагъэу къыра­IуалIэхэрэр ыштэным афэхьазыр. ПэшIорыгъэшъ мэкъэтыныр кандидатхэм якъыхэхын зэрэфэIорышIэрэм имызакъоу, партием хэ­хъоныгъэ егъэшIыгъэнми, ащ исатырхэм нахьыбэу къотэгъу­хэр, зицыхьэ зытелъы­жьырэ ныбжьыкIэ хъупхъэхэр къыхэщэгъэнхэми афэлажьэ», — хигъэунэфыкIыгъ Владимир Путиным.

ОНФ-м Свердловскэ хэкумкIэ ишъолъыр гъэцэкIэкIо комитет ипащэу, движениеу «Мы вместе» зыфиIорэм чанэу хэлажьэу Жанна Рябцевам зэрилъы­тэ­рэмкIэ, партием игъоу къафи­лъэгъугъэ шIыкIэр волонтерхэм политикэм зыкъыщагъотынымкIэ амалышIоу щытхэм зыкIэ ащыщ. ПэшIорыгъэшъ мэкъэтынэу 2016-рэ илъэсым щыIагъэм ар хэлэжьэгъагъ, ау пхы­рыкIынэу хъугъагъэп. Президентым Джэпсалъэр къызешI нэуж ыкIуачIэ политикэм щиушэтынэу ащ джыри зэ рихъухьагъ.

Общественникхэу политикэм хэхьагъэхэм цIыфхэм яIофыгъо­хэм язэшIохын нэмыкI екIолIакIэ фыряIэ мэхъу. Къуаджэхэм адэс ныбжьыкIэхэм я Урысые союз итхьаматэу, партием ипэшIорыгъэшъ мэкъэтынэу Мордовием щыкIуагъэм щатекIуагъэу Юлия Оглоблинам зэIукIэгъум къызэ­рэщиIуагъэмкIэ, ыпкIэ хэмы-лъэу газыр яунэхэм зэрафыращэлIэщтым ехьылIэгъэ законым игъэцэкIэн зырагъэукIыхьыным цIыфхэр тещыныхьэх.

Владимир Путиным ащ ­джэуап къыритыжьызэ, цIыфхэр агъэгугъэнхэм ыпэкIэ ама­лэу щыIэхэр къыдалъытэн зэрэфаер хигъэунэфыкIыгъ.

«Пстэури къишъудзэу, Iофыгъохэр жъугъэцэкIэнхэ шъулъэ­кIынэу зэфэхьысыжь зышъу­шIыкIэ, а пшъэрылъэу шъуапа­шъхьэ итым изэшIо­хынкIэ ама­лэу щыIэр зэкIэ зэжъугъэуIун, шъуфэлъэкIыщтыр зэкIэ шъушIэн фае. Къэралыгъо Думэм идепутат шъузыхъукIи, ащ фэдэ шап­хъэхэм тапэкIи шъуарыгъо­зэнэу сэгугъэ», — къыIуагъ Президентым.

ПолитикэмкIэ хэгъэгум ищыIэныгъэ яфэмэ-бжьымэ тырагъэ­хьан, цIыфхэм IэпыIэгъу афэ­хъунхэ алъэкIынэу волонтерхэм алъытэ. Урысые общественнэ организациеу «Ныхэм я Совет» итхьаматэу, ОНФ-м иэкспертэу, пэшIорыгъэшъ мэкъэтынэу Москва икойхэм ащыщ горэм щыкIуагъэм текIоныгъэр къыщыдэзыхыгъэ Татьяна Буцкаям къызэриIуагъэмкIэ, сабыибэ зэрыс унагъокIэ плъытэмэ хъущтым игъэунэфынкIэ зэрэ­хэгъэгоу зэфэдэ шапхъэ ща­штэным игъо хъугъэ. Москва щыпсэурэ унагъор автомобиль гъогоу къалэр къэзыухъурэирэм ыкIыбкIэ щыпсэунэу зыкощыжькIэ, статусэу иIагъэр зэрэ­шIокIодырэр ащ шIотэрэзэп. Ны мылъкур унэм игъэцэкIэжьын пэIуагъахьэ бэмэ ашIоигъу.

КIэлэцIыкIу тIысыпIэ зэрыт таксим пае тарифыр зэрэнахь иным епхыгъэ Iофыгъоми хэп­лъэгъэн фаеу ащ елъытэ. Къэра­лыгъом ипащэ общественницэм ипредложениехэм къадыригъэштагъ.

«Таксим имызакъоу, транспортым инэмыкI лъэпкъхэмкIи тарифхэм яхьылIэгъэ Iофыгъом дэлэжьэгъэн фае. Гъэ­цэкIэжьынхэм апае ны мылъкур агъэфе­дэн зэралъэ­кIыщтым иIоф егу­пшысэгъэн фае.

ГъэцэкIэжьын IофшIэныр зыфэдэри, ар ашIы­нэу зыкIэмыхъугъэри ашIэн, ахъ­щэр хьаулые мыхъунри къы­дэ­лъытэгъэн фае. Мы Iофым лъэшэу анаIэ тетхэу екIо­лIэнхэ фае. Ащ фэдэ мылъкур шIуа­гъэ къытэу зэрагъэфедэщтым епхыгъэ гу­пшы­сэхэр къа­шъхьапэщтых», — къы­Iуагъ Владимир Путиным.

Ащ зэрэхигъэунэфыкIыгъэмкIэ, пэшIорыгъэшъ мэкъэтыным цIыфхэм предложениеу къыщахьыгъэхэр пэшIорыгъэшъ мэ­къэтыным щатекIуагъэхэми «Единэ Россиеми» яIофшIэнкIэ лъапсэ хъущтых.

«ЦIыфхэр зыгъэгумэкIхэ­рэмкIэ, мафэ къэс зэутэлIэрэ IофыгъохэмкIэ къыддэгощагъэх. Ахэм игъоу алъэгъухэ­рэри, шIэгъэн фаехэри къа­Iуагъэх. Партием зэкIэ хэтхэм ахэм ягъэцэкIэнкIэ пшъэдэ­кIыжь ахьыщт. ТапэкIэ тиIоф­шIэн зэ­хэтщэнымкIэ, партием и Программэ игъэхьазырынкIэ ахэр лъапсэ хъущтых», — къыIуагъ Президентым.

Программэм ипроект партием и Зэфэсэу мэкъуогъум и 19-м щыIэщтым щаухэсыщт. Дмитрий Медведевым Владимир Путиныр ащ хэлэжьэнэу къыригъэблэгъагъ. Зэфэсым ыуж шъолъырхэм арысхэр жъу­гъэу Программэм тегущыIэщтых. ЗэIукIэгъум икIэух Президентыр пэшIорыгъэшъ мэ­къэтыным щатекIуагъэхэм афэ­гушIуагъ.

«Цыхьэшхоу къышъуфашIы­гъэр къэжъугъэшъыпкъэжьыным пае шъуфэлъэкIыщтыр зэкIэ шъушIэ. Мы Iофым непэ шъу­зэрекIолIагъэмкIэ теубытагъэ хэлъэу къэсIон слъэ­кIыщт джащ тетэуи зэрэхъущтыр», — къыIуагъ Владимир Путиным.