Наркотикхэм апэшIуекIогъэным ыкIи псауны­гъэр псыхьэгъэным афэгъэхьыгъэ соци­альнэ рекламэм епхыгъэ зэнэ­къокъоу «Спасем жизнь вместе» зыфиIорэм изэфэхьы­сыжьхэр мы мафэхэм къэнэфагъэх.

ШIэныгъэхэм защахагъэхъорэ Адыгэ республикэ институтым текIоныгъэ ыкIи хагъэунэфы­кIырэ чIыпIэхэр къыдэзыхы­гъэхэр щагъэшIуагъэх.

АР-м хэгъэгу кIоцI IофхэмкIэ и Министерствэ наркотикхэр къызэрэрагъэкIокIыхэрэм лъыплъэрэ иотдел ипащэ игуа­дзэу, полицием иполковникэу Агъыр­жьэнэкъо Аслъан, под­разде­лением икъулыкъушIэу, поли­цием икапитанэу Елена Даниловар анахь дэгъоу зы­къэзыгъэ­лъэгъуагъэхэм афэгу­шIуагъэх.

Зэнэкъокъур уцугъо зэфэ­шъхьафхэмкIэ зэтеутыгъагъ. Анахь буклет дэгъу къэзышIыгъэу агъэнэфагъэр «КIэлэцIыкIухэм ыкIи нахьыжъхэм ясэнау­щыгъэ зыщыхагъэхъорэ Мые-къопэ гупчэр» зыфаIорэм ипе­дагог-IофышIэхэу Оксана Да­выдовар, Елена Быстрых ыкIи Диана Кожубековам текIоныгъэ къыдахыгъ ыкIи апэрэ шъуа­шэ зиIэ Дипломыр афагъэшъошагъ.

Мыекъопэ медицинэ колле­джым истудентэу Михаил Федосеевым иIофшIэн рекламэмкIэ анахь макет дэгъоу алъытагъ.

Тэхъутэмыкъое районымкIэ гурыт еджапIэу N 5-м щеджэрэ Глеб Лянко зэхигъэуцогъэ фильмэ цIыкIур анахь гъэшIэгъонэу къыхахыгъ.

ТекIоныгъэ къыдэзыхыгъэхэм афагъэшъошэгъэ дипломхэм АР-м гъэсэныгъэмрэ шIэныгъэм­рэкIэ иминистрэу КIэрэщэ Анзаур акIэтхагъ.

IофшIэн анахь дэгъухэр Моск­ва агъэхьыгъэх, зэнэкъокъум ифедеральнэ уцугъо ахэр хэлэжьэщтых.