Адыгэ Республикэм искусствэхэмкIэ икIэлэ­цIыкIу еджапIэу Лъэцэрыкъо Кимэ ыцIэ зыхьы­рэм зэфэхьысыжь концерт щыкIуагъ.

ЕджапIэм ипащэу Анзорыкъо Марзет илъэс IофшIэгъур зэрэ­кIуагъэм къытегущыIагъ. Зэпа­хырэ узым къыхэкIэу зэхахьэу яIэн фэягъэм ипчъагъэ къыщыкIагъэми, кIэлэеджакIохэм яшIэныгъэ хагъэхъуагъ. Онлайн шIы­кIэр зэрагъэфедагъэм шIуагъэ къытыгъ.

Зэфэхьысыжь концертым бзэпсхэмкIэ ансамблэм, Iупэпщынэхэм яоркестрэ, гитарэм къезыгъэIорэ нэбгырищмэ, орэдыIохэм произведениехэр агъэ­жъынчыгъэх. Скрипкэр, виолончелыр, фортепианэр, домрэр, шыкIэпщынэр, къамылыр, нэ­мыкI музыкальнэ Iэмэ-псымэхэр кIэлэеджакIохэм кон­цертым ща­гъэфедагъэх. Орэд къэзыIуагъэ­хэм адежъыугъэх. Елизавета Гмызинам зэхахьэр зэрищагъ.

Псэ зыпыт орэдышъом уедэ­Iузэ, уегъэгумэкIы, гушхоныгъэ къыпхелъхьэ. Классикэм хэхьа­гъэхэ произведениехэр кIэлэ­цIыкIухэм къырагъаIохэзэ, дунэе искусствэм нахь хэщагъэхэ мэхъух.

Къэралыгъо консерваториеу П. И. Чайковскэм ыцIэ зыхьырэм ипрофессорэу Д. А. Рябовам музыкальнэ еджапIэм ия 2-рэ класс Марк Гротте щырегъаджэ. Ф. Шопен ивальсхэм ащыщ шъэо­жъыем ыгъэжъынчыгъ.

Пчыхьэзэхахьэхэм, концертхэм язэхэщэнкIэ IэпыIэгъу къафэхъу­хэрэ ны-тыхэм Анзорыкъо Марзет «тхьашъуегъэпсэу» ариIо­жьыгъ, щытхъу тхылъхэр аритыжьыгъэх.

ЕджапIэм иIорыIотэ къутамэ зыщызыгъасэхэрэм адыгэ фольклорым къыхахыгъэ едзыгъохэр гъэшIэгъонэу къашIыгъэх.

ГъукIэлI Дианэ, ПIапIэ Самирэ, Хъо­кIон Сэлимэт, ХъокIон Аминэт, Цэй Гунэс, Цыргъой Суандэ, Блэгъожъ Бэлэ, Цэй Индар, ­нэмыкIхэри ансамблэу «Нэ­бзыим» хэтых. Унагъом къихъогъэ сабыим ику­шъэхапхэ фэгъэ­хьыгъэ театра­лизованнэ едзыгъор зэгъэфагъэу къашIыгъ. Лъэпкъ гупшысэр щыпхыращызэ, сабыим ­унагъор зэригъэпы­тэрэр къыхагъэщыгъ.

Блэгъожъ Айтэчрэ Къэлэшъэо ТIахьиррэ нарт орэдхэр мэ­къэ IэтыгъэкIэ къаIуагъэх. КIэлэегъа­джэхэу Шъхьэбэцэ Маринэ, Чэркай Даринэ, ГъукIэ Замудин зэхэщэн Iофыгъохэр зэрахьагъэх.

Искусствэм цIыфыр зэрипIурэр, щыIэныгъэм зэрэфигъасэрэр зэфэхьысыжь зэхахьэм къы­щагъэлъэгъуагъ.