IэпыIэгъу афэхъущтых
Мэкъуогъум и 2-м Урысыем ошIэ-дэмышIэ IофхэмкIэ и Министерствэ и ГъэIорышIэпIэ шъхьаIэу АР-м щыIэм изэхэт диспетчер къулыкъу макъэ къырагъэIугъ ощхышхоу щыIагъэм ыпкъ къикIыкIэ республикэм ипсэупIи 3-мэ адэсхэм ащыщхэм псыр акIэхьагъэу.
Адыгеим и ЛIышъхьэу КъумпIыл Мурат ипшъэрылъкIэ гумэкIыгъо зыщыхъугъэ чIыпIэм Премьер-министрэу Геннадий Митрофановыр кIуагъэ. ХэушъхьафыкIыгъэ комиссиехэм унэхэр ыкIи щагухэр къаплъыхьэх, ощхышхоу щыIагъэм зиунэе мылъку зэрар зэрихыгъэ пстэуми ящыкIэгъэ IэпыIэгъур арагъэгъотыщт.
ОшIэ-дэмышIэ IофхэмкIэ ГъэIорышIапIэм ипресс-къулыкъу къызэритыгъэмкIэ, Мыекъопэ районым ит станицэу Кужорскэм речъэкIырэ псыхъоу Зераль дэт псым зыкъызэриIэтыгъэм къыхэкIэу уни 6-мэ псыр арыхьагъ ыкIи щагуи 6-мэ ар адэхьагъ. Социальнэ мэхьанэ зиIэ псэолъэшIыгъэхэм псыр анэсыгъэп.
Мыекъопэ районым ипоселкэу Тульскэм унэгъуи 9-мэ яунэхэм псыр арыхьагъ, щагу 30-мэ ар акIэуагъ.
ГумэкIыгъо хэфагъэхэм Джэджэ районыр ащыщ. Къутырэу Курскэм щыпсэурэ унэгъуи 5-мэ яунэхэм псыр арыхьагъ ыкIи щагуи 9-мэ адэхьагъ.
ТхьамыкIагъо къызыщыхъугъэ чIыпIэм кIуагъэ Премьер-министрэу Геннадий Митрофановыр, джащ фэдэу мыщ Iоф щашIэ Урысыем и МЧС и ГъэIорышIэпIэ шъхьаIэу АР-м щыIэм ипащэу, полковникэу Станислав Илющенкэм, муниципальнэ образованиеу «Мыекъопэ районым» ипащэу Олег Топоровым.
Урысыем и МЧС и ГъэIорышIэпIэ шъхьаIэу АР-м щыIэм иоперативнэ штаб Щыщэ Эдуард ипащэу зэпымыоу Iоф ешIэ.
ОшIэ-дэмышIэ IофхэмкIэ къулыкъум къызэритыгъэмкIэ, мэкъуогъум и 2-м сыхьатыр 2-м ехъулIэу ощхыр зэпыугъ, псыр зэкIакIоу ыублагъ.
Мыекъопэ ыкIи Джэджэ районхэм ошIэ-дэмышIэ Iофхэр къэмыгъэхъугъэнхэмкIэ ыкIи ахэр дэгъэзыжьыгъэнхэмкIэ якомиссиехэм псыр зыкIэогъэ унэхэр къакIухьэх, Iофхэм язытет зэрагъашIэ.
Ощхым къыздихьыгъэ гумэкIыгъохэм ядэгъэзыжьын ошIэ-дэмышIэ IофхэмкIэ къулыкъум иIофышIэ 52-рэ ыкIи итехникэ 18-рэ хэлажьэ. ГидрометеорологиемкIэ ыкIи тыкъэзыуцухьэрэ дунаим лъыплъэгъэнымкIэ Адыгэ гупчэм къызэритыгъэмкIэ, сыхьат 12-м къыкIоцI миллиметрэ 16 — 23-рэ фэдиз ощх къещхыгъ.
Iэшъынэ Сусан.
Сурэтхэр ошIэ-дэмышIэ IофхэмкIэ ГъэIорышIапIэм ипресс-къулыкъу къытIэкIигъэхьагъ.