ЖъоныгъуакIэм и 27-м «Библиотекарь будущего» зыфиIорэ урысые форумыр Урысые Къэралыгъо ТхылъеджапIэм, Пашковым и Унэ, щыкIуагъ. Урысые тхылъеджапIэхэм я Мафэ Iофтхьабзэр фэгъэ­­хьыгъагъ.

Форумым хэлэжьагъэхэм шIуфэс гущыIэхэмкIэ къапэгъо­кIыгъэх УФ-м культурэмкIэ иминистрэу Ольга Люби­мовар, ащ игуадзэу Ольга Яриловар, нэмыкIхэри.

Лъэпкъ проектэу «Культурэм» хэхьэрэ модельнэ муници­пальнэ тхылъеджапIэхэр зэрифэ­шъуашэу зэрашIыгъэхэм фэшI шъолъырхэм ащыщхэр къыхагъэщыгъэх. Ахэм Адыгэ Рес­публикэри ащыщ хъугъэ.

«Тхылъеджэхэм псынкIэу ахэ­гъэхъогъэныр» зыфиIорэ лъэ­ныкъомкIэ Дондуковскэм дэт модельнэ тхылъеджапIэм текIоныгъэ къыдихыгъ. Адыгеим культурэмкIэ и Министерствэ, АР-м и Лъэпкъ тхылъеджапIэ яIофшIэн Iофтхьабзэм къыщыхагъэщыгъ. Джащ фэдэу стратегическэ инициативэхэмкIэ Агентствэм зигугъу къышIыгъэ­хэм ащыщ Очэпщые дэт къоджэ модельнэ тхылъеджапIэр.

Адыгэ Республикэм культурэмкIэ иминистрэу Аулъэ Юрэ къызэрэхигъэщыгъэмкIэ, модельнэ тхылъеджапIэхэр апэрэу зышIыгъэ шъолырхэм Адыгеир ащыщ. Лъэпкъ проектэу «Культурэм» къыдыхэ­лъытагъэу 2019 — 2020-рэ илъэсхэм респуб­ликэм модельнэ тхылъеджэпIи 8 щагъэпсыгъ. 2020-рэ илъэсым тхылъеджэпIэ фондым тхылъ мин 47,42-рэ (тхыгъэхэу ыкIи электроннэхэу) къыIэкIэхьагъ. 2019-рэ илъэсым егъэпшагъэмэ, ар процент 17-кIэ нахьыб. ПстэумкIи респуб­ликэм тхылъеджэпIи 144-рэ ит.

Адыгэ Республикэм и ЛIышъхьэ модельнэ тхылъеджапIэхэм ягъэпсын хэлэжьэгъэ пстэуми зэрафэразэр къыIуагъ. Муниципалитет пэпчъ ащыIэ тхылъ­еджапIэхэм яIофшIэн нахьышIоу зэхэщэгъэн, культурнэ Iофтхьабзэхэм апае ахъщэу афатIупщырэм хэгъэхъогъэн зэрэфаер КъумпIыл Мурат игущыIэ къыщыхигъэщыгъ.

Абрэдж Сэтэнай.