ЖъоныгъокIэ мазэм шъолъыр гъэIорышIэнымкIэ Гупчэм Iоф зэришIагъэр зэфихьысыжьыгъ.

ЗэрагъэунэфыгъэмкIэ, Адыге­им щыпсэухэрэм гъогогъу 900 фэдизрэ Гупчэм зыкъыфагъэзагъ. Анахьэу гумэкIыгъохэр зыфэгъэхьыгъагъэхэр зэтегъэ­псыхьаныр, гъогухэм ягъэцэ­кIэжьын, коронавирусым пэшIуе­кIорэ вакцинэхэм яхэлъхьан.

Сабыйхэм апае къатырэ ахъ­щэм, кIэлэцIыкIухэм ягъэмэфэ зыгъэпсэфыгъорэ апкъышъол псыхьэгъэнымрэ афэгъэхьы­гъэхэри зыгъэгумэкIыхэрэм ащыщхэу къэнэжьых. Гъэмэфэ зыгъэпсэфыгъом ехъулIэу социальнэ хъытыухэм @tsur_01 къащитыгъ зыныбжь имыкъу­гъэхэм охътэ гъэнэфагъэм Iоф­шIэн арагъэгъотынымкIэ шап­хъэу щыIэхэр.

ИкIыгъэ мазэм Гупчэмрэ хэ­бзэ къулыкъухэмрэ зэгъусэхэу Iофыгъо 420-рэ зэхафыгъ. Зыкъызэрафагъазэрэр нахь къызэрыкIо шIыгъэным пае социальнэ хъытыухэм ащыщ — ВКонтакте — хэушъхьафыкIыгъэ виджет щагъэпсыгъ. Къэ­барыр алъыбгъэIэсыным пае Адыгеим шъолъыр гъэIорышIэнымкIэ и Гупчэ инэкIубгъо уихьанышъ, укIэтхэнышъ, гу­мэкIыгъоу уиIэм ышъхьэ къип­хын фае.

Къэралыгъом амалэу цIыфхэм къаритыхэрэм афэгъэхьыгъэ къэбарыр зэраIэкIагъа­хьэ­рэм зыкъегъэIэтыгъэным ылъэ­ныкъокIэ зэдэлэжьэ зэпытых. БэмышIэу Мыекъуапэ щыпсэурэ бзылъфыгъэ горэм Гупчэм зыкъыфигъэзагъ. Ащ къызэриIуагъэмкIэ, илъэсым тIо хэушъхьафыкIыгъэ цуакъэхэр къыратых. Ау гъэмэфэ лъэхъаным тегъэ­псыхьагъэр къыIэкIэхьаным пае ащкIэ шыхьат тхылъыр мэкъуогъум и 15-м нахьыжьэу къыфыратхыкIыщтэп. Дунаир зы­щыфабэм кIымафэм тегъэпсы­хьагъэр зэрэщымыгъышъущтыр нафэ. ГумэкIыгъом изэшIохын къыхагъэлэжьагъэх социальнэ ухъумэнымкIэ Фондым иIофы­шIэхэр. Москва ипротез-ортопедическэ хъызмэтшIапIэ икъу­тамэу Мыекъуапэ дэтым зы­фагъэзэнымкIэ ахэр IэпыIэгъу хъугъэх ыкIи мазэкIэ нахь пасэу цуакъэхэр бзылъфыгъэм къы­IэкIэхьанхэу ашIыгъ. Мы къэбарыр ащкIэ гушIуагъо хъугъэ, рэзэныгъэ гущыIэхэр къафи­гъэзагъэх.

Красногвардейскэ районым къикIыгъэ гумэкIыгъор зыфэ­гъэхьыгъагъэр урамэу Боль­ничнэр ары. 2019-рэ илъэсым терроризмэм епхыгъэу щынэгъончъэным пае сымэджэщым зы дэхьапIэ къыфагъэнэгъагъ, ау ащ лъэсрыкIо гъогу къекIуа­лIэщтыгъэп, машинэ гъэуцу­пIэ­хэри иIагъэхэп. Мыщ гъогурыкIоным ишапхъэхэр бэрэ щаукъохэу къыхэкIы. Къэтхагъэр ащ фэдэ хъугъэ-шIагъэ хэфагъэу щытыгъ мэзих зыныбжь сабыир ыIыгъэу гъогум зэпырыкIызэ. Зыкъызэрэфагъэза­гъэм иIофыгъо зызэрегъэшIэ уж район пащэм зэхэсыгъо зэхищагъ ыкIи чIыпIэм изэтегъэ­псыхьан фэгъэхьыгъэ унашъо ышIыгъ. ЖъоныгъуакIэм и 20-м къыщыублагъэу ащ IофшIэнхэр щызэшIуахых. Красногвардейскэ къоджэ коим иадминист­рацие иунашъокIэ лъэсрыкIо гъогу щагъэпсыгъ, гъогур агъэ­кIэжьы — ар нахь шъуамбгъо ашIыщт ыкIи машинэ уцупIэхэр хашIыхьащтых.

Мазэу икIыгъэм Гупчэм ­район администрациехэм ыкIи къоджэ псэупIэхэм яадминист­рациехэм апае егъэджэнитIу зэхищагъ. Ахэр зыфэгъэхьыгъа­гъэхэр хэбзэ къулыкъухэм социальнэ хъытыухэм Iоф зэращашIэн фаер, нэкIубгъохэр щы­ряIэнхэм мэхьанэу иIэр, нэ­мыкIхэри. ЦIыфхэм зыкъызэрафагъэзэрэ Iофыгъохэр нахь псынкIэу зэхафынхэм ыкIи зэшIохыгъэ хъунхэм пстэури тегъэпсыхьагъ.

Шъолъыр гъэIорышIэнымкIэ Гупчэм и тelegram-канал шъу­кIэтхэным пае мы шъулъэгъурэ QR кодыр IэпыIэгъу къышъу­фэхъущт.