Урысыем и ошъогу-космос кIуачIэхэм сам­бэм­кIэ язэнэкъокъу Мыекъуапэ щыкIуагъ.Калининград къыщегъэжьагъэу КъокIыпIэ Чыжьэм нэс  къа­рыкIыгъэ командэ 16 зэIукIэгъум хэлэжьагъ. Апэрэ чIыпIэхэм якъыдэхынкIэ бэнэкIуи 130-рэ зэнэкъокъугъ.

Краснодар апшъэрэ дзэ авиа­ционнэ училищэу Советскэ Союзым и ЛIыхъужъэу А. Серовым ыцIэ зыхьырэм ихэшыпыкIыгъэ командэ хэтхэу Адыгеим щыщ кIалэхэм яIэпэIэсэныгъэ алырэгъум къыщагъэлъэгъуагъ.

— Хэгъэгум ишъолъыр 40-мэ ялIыкIохэр Мыекъуапэ щызэIу­кIагъэх, — къытиIуагъ зэнэкъо­къум исудья шъхьаIэу, дунэе категорие зиIэ судьяу, Урысыем, Адыгеим язаслуженнэ тренерэу Хъот Юныс. — 2019-рэ илъэсым мыщ фэдэ зэIукIэгъухэр Адыгеим дэгъоу зэрэщыкIогъагъэхэр зэхэщакIохэм къыдалъыти, ятIо­нэрэу Мыекъуапэ къыхахыгъ.

— Адыгеим испорт псэуалъэ­хэр илъэс къэс нахь зэтегъэ­псыхьагъэ мэхъух, Мыекъопэ бэнэпIэ еджапIэр дунаим анахь щыцIэрыIохэм ахалъытэ, — тизэдэгущыIэгъу лъегъэкIуатэ АР-м дзюдомкIэ испорт еджапIэу Кобл Якъубэ ыцIэ зыхьырэм ипащэу, Адыгеим изаслуженнэ тренерэу Бастэ Сэлым. —ТибэнакIохэм тагъэгушIуагъ.

Дэхъу Азэмат, кг 64-рэ, ПашIо Алый, кг 71-рэ, Ингъуш Владимир, кг 98-рэ, Хъот Заур, кг 78-рэ, Евченко Сергей, кг 98-м къехъу, апэрэ чIыпIэхэр къыдахыгъэх, дышъэ медальхэр къафагъэшъошагъэх.

А. Дэхъур, А. ПашIор, З. Хъотыр, С. Евченкэр Урысыем спортымкIэ имастер хъугъэх.

Павел Трощенкэм, кг 58-рэ, джэрзыр къыхьыгъ.

Краснодар апшъэрэ дзэ авиационнэ училищым ихэшыпыкIыгъэ командэ апэрэ чIыпIэр къыдихыгъ. Воронеж хэкур ятIонэрэ хъугъэ, Челябинскэ ибэнакIохэм ящэнэрэ чIыпIэр афагъэшъошагъ.

Адыгэ Республикэм испорт Унэшхоу «Ошъутенэм» щыкIогъэ зэнэкъокъум хэлэжьагъэхэр зэ­хэщакIохэм лъэшэу афэразэх. ТибэнакIохэу Ингъуш Владимир, Дэхъу Азэмат, ПашIо Алый, нэмыкIхэм ятренерхэм «тхьашъуе­гъэпсэу» араIожьыгъ. Респуб-ли­кэм дзюдомкIи, самбэмкIи яеджа­пIэхэм тибэнакIохэм зыщагъэхьазырыгъ.

Ингъуш Владимир хэгъэгум идышъэ медаль ятIонэрэу къыдихыгъ. СамбэмкIи дзюдомкIи мэбанэ. Адыгеим испортсмен цIэрыIохэм щысэ атырихызэ, кIуачIэр епсыхьэ, икъулай хе­гъахъо.

Гъэхъагъэ зышIыгъэ дзэкIолI­-спортсменхэм тафэгушIо, спортышхом нахь щызэлъашIэнхэу афэтэIо.

Сурэтым итхэр: щытхъур къэ­зыхьыгъэ бэнакIохэр, еджапIэм иофицерхэр.