Адыгеим и ЛIышъхьэу КъумпIыл Мурат тыгъуасэ Мыекъопэ районым щыIагъ, социальнэ мэхьанэ зиIэ учреждениехэм яIофшIэн ащ нэIуасэ зыщыфишIыгъ.

Апэрэ чIыпIэу зэкIолIагъэр социальнэ IыгъыпIэу «Джэныкъу» зыфиIорэр ары. Мыр кIэлэцIыкIухэмрэ Iэтахъохэмрэ афы­тегъэпсыхьагъэу щыт. Адыгеим и ЛIышъхэ игъусагъэх Адыгэ Республикэм хэгъэгу кIоцI IофхэмкIэ иминистрэу Иван Бахиловыр, Адыгэ Рес­публикэм IофшIэнымрэ социальнэ хэхъоныгъэмрэкIэ иминистрэу Мырзэ Джанбэч, Мые­къопэ районым ипащэу Олег Топоровыр.

Мы учреждениер зыфытегъэ­псыхьагъэр зыныбжь имыкъугъэ кIэлэцIыкIухэу щыIэныгъэм чIыпIэ зэжъу ригъэуцуагъэхэм псынкIэу социальнэ Iэ­пыIэгъу ятыгъэныр ары. Уч­реждением ипащэу Алексей Шпигаревым къызэриIуагъэмкIэ, «Джэныкъом» илъэси 3-м къыщегъэжьагъэу илъэс 18-м нэс зыныбжь нэбгырэ 30 чIэфэ. Мыхэм ежь-ежьырэу IэпыIэгъу къыкIэлъэIугъэхэри, ны-тыхэм яшIоигъоныгъэкIэ къаратыгъэхэри, хабзэм икъулыкъу гъэнэфагъэхэр къызэрэкIэлъэIугъэхэм тетэу къычIэфагъэхэри ахэтых. 2020-рэ илъэсым зыныбжь имыкъугъэ кIэлэцIыкIу 47-рэ щыIэныгъэм хагъэгъозэжьыгъ.

Республикэм и ЛIышъхьэу КъумпIыл Муратрэ хэгъэгу ­кIоцI IофхэмкIэ министрэу Иван Бахиловымрэ кIэлэцIыкIухэм гущыIэгъу афэхъугъэх ыкIи шIу­хьафтынхэр аратыжьыгъэх. Зэ­дэгущыIэгъум илъэхъан Адыге­им и ЛIышъхьэ анахьэу ынаIэ зытыригъэтыгъэр щыIэ­кIэ-псэукIэу мыщ щыряIэр, ягъэ­сэнрэ языгъэпсэфыгъо уахътэрэ зэрагъакIохэрэр ары. КъумпIыл Мурат спортивнэ за­лыр, зыщеджэхэрэ классхэр зэригъэлъэгъугъэх.

2018-рэ илъэсым мы учреждением кIэлэцIыкIухэр зэрэрагъэджэщтхэ программэхэмкIэ лицензие къыратыгъагъ. IыгъыпIэм иIофышIэхэм программэхэр лъэныкъуитIумэ ате­гъэпсыхьагъэхэу зэхагъэуцуагъэх: япсауныгъэ къэухъумэгъэнымрэ IофшIэным фэщагъэ­хэу пIугъэнхэмрэ.

Мы учреждением ипащэхэм республикэм и ЛIышъхьэ зы­къыфагъэзагъ лъэIукIэ: кIэлэцIыкIухэм джэгупIэ чIыпIэ гъэ­нэфагъэ афэшIыгъэныр. КъумпIыл Мурат ащ дыригъэштагъ ыкIи Адыгэ Республикэм Iоф­шIэнымрэ социальнэ хэхъоныгъэмрэкIэ иминистрэу Мырзэ Джанбэч а Iофым изэшIохын фэгъэзэгъэнэу пшъэрылъ фи­шIыгъ.

Нэужым Адыгеим и ЛIышъхьэ псэупIэу Каменномостскэм ис­кусствэхэмкIэ кIэлэцIыкIу еджа­пIэу дэтым щыIагъ. Илъэсэу икIыгъэм лъэпкъ проектэу «Куль­турэм» тегъэпсыхьагъэу игъэкIотыгъэ гъэцэкIэжьынхэр мыщ щыкIуагъэх. Ахэр зыгъэцэкIагъэхэр ООО-у «Альфа-­Безопасность» зыфиIорэр ары. ИгъэкIотыгъэ гъэцэкIэжьынхэм сомэ миллион 28,5-рэ апэIуагъэхьагъ.

Адыгэ Республикэм культурэмкIэ иминистрэу Аулъэ Юрэ къызэриIуагъэмкIэ, мы гъэцэ­кIэжьын IофшIэнхэм къадыхэлъытагъэу унашъхьэр, унэкIоцI коммуникациехэр зэблахъугъэх, ящыкIэгъэ оборудованиер къащэфыгъ, унэм ыкIоцIи ыкIыби агъэлагъэх. Непэ а еджапIэм кIэлэцIыкIу 200 фэдиз къэкIо. Ахэр псэупIэхэу Каменномостскэм, Победэм, къутырэу Веселэм, псэупIэхэу Дахъом, Аб­дзэхэхьаблэ ыкIи Усть-Сахрай къарэкIых. КIэлэцIыкIухэр сурэтшIыным, къашъохэм, музыкэм ыкIи нэмыкIхэм афа­гъасэх. Республикэм ыкIи Уры­сыем инэмыкI чIыпIэхэм ащыкIохэрэ зэнэкъокъухэм ахэр ахэ­лажьэх, чIыпIэ дэгъухэри къахьыхэу къыхэкIы.

ЕджапIэм Iоф щызышIэхэрэм гущыIэгъу зафэхъум КъумпIыл Мурат ынаIэ зытыри­дза­гъэр фэныкъоныгъэхэу яIэ-хэр ары. Директорэу Марина Зеленько къызэриIуагъэмкIэ, пиа­нинакIэ ящыкIагъэу щыт. Адыгэ Республикэм культурэмкIэ иминистрэ ыгъэгугъагъэх мы илъэсым ар зэрафащэфыщтымкIэ.

ИкIэухым хьакIэхэр ыкIи кIэ­лэцIыкIухэр еплъыгъэх онлайн­порталэу «Культура» зыфиIорэм. ЕджапIэм иактовэ зал ар щызэхащэгъагъ.

Адыгэ Республикэм и ЛIышъхьэ ипресс-къулыкъу