Урысые Федерацием и Федеральнэ ЗэIукIэ и Къэралыгъо Думэ идепутатэу Хьасаныкъо Мурат партиеу «Единэ Россием» зэхищэрэ пэшIорыгъэшъ мэ­къэ­тыным хэлэжьэнэу къалэу Мыекъуапэ дэт гурыт еджапIэу N 11-м къы­щы­зэIуахыгъэ участкэм щыIагъ.

Мы партием ыцIэкIэ Федеральнэ ЗэIукIэм и Къэралыгъо Думэ идепутатынхэмкIэ кандидатхэр, джащ фэдэу Урысые Федерацием ишъолъырхэм якъэралыгъо хабзэ илIыкIо кIулыкъухэм ядепутатынхэмкIэ кандидатхэр къагъэлъэгъонхэм пае пэ­шIорыгъэшъ мэкъэтыныр зэ­хащэ.

— Урысые Федерацием и Федеральнэ ЗэIукIэ и Къэралыгъо Думэ хэ­тыщтхэм япхыгъэ пэшIорыгъэшъ хэдзынхэр апэ дэдэ 2007-рэ илъэсым мэкъуо­гъу-шышъхьэIум типартие зэхищэгъагъ. Джащ къыщегъэжьагъэу Iофыгъоу зэшIуахыхэрэр нахь тэрэз зэрэхъущтхэр ыкIи лъэныкъуакIэхэр къыдалъытэхэзэ, а Iоф­шIэныр лъагъэ­кIуатэ. НепэкIэ анахь мэхьанэ зиIэр хэдзакIохэм занкIэу алъыIэсынхэ алъэкIыныр, цIыф жъугъэхэм яшIои­гъоныгъэхэр икъоу къы­дэлъытэгъэнхэр ары. Политикэ Iофтхьабзэхэм нахь нэфэгъэ икъу ахэлъыным пае хэгъэгум ипащэхэм, партиехэм зэрахьэхэрэ Iофыгъохэм яшIуагъэ къэ­кIощт, — къыIуагъ Хьасаныкъо Мурат.

НепэкIэ республикэм лъытэкIо участкэ 59-мэ Iоф щашIэ. Роспотребнадзорым иунашъокIэ зэкIэми нэгуихъохэр, рециркуляторхэр аIэкIагъахьэх, мафэм къыкIоцI унэхэм пчъагъэрэ жьы къабзэ арагъахьэ, сапэр хъэдэн шынэкIэ алъэкIы.

Къандор Анзор.

Урысые Федерацием и Федеральнэ Зэ­IукIэ и Къэралыгъо Ду­мэ идепутат иIэпы­Iэгъу.