Тыгъуасэ я 11-рэ классхэр къэзыуххэрэм къэралыгъо ушэтын зыкIхэм ятын рагъэжьагъ. Предмети 3-кIэ а мафэм ушэтынхэр кIуагъэх: географиемкIэ, литературэмкIэ, химиемкIэ.

Ушэтынхэр щатынхэм пае республикэм пункти 8 щагъэ­нэфагъ, ахэм ащыщэу 2-р —МыекъуапэкIэ.

Адыгеим и ЛIышъхьэу КъумпIыл Мурат ушэтынхэмкIэ къэралыгъо комиссием зэрэхэтым елъытыгъэу къалэу Мыекъуапэ дэт лицееу N 19-м, химиемкIэ ушэтыныр зыщыкIорэм, щыIагъ. Республикэм ипащэ ушэтынхэр зэрэзэхащэхэрэм зыщигъэгъозагъ, кIэлэегъаджэхэми зэхэщакIохэми зэдэгущыIэгъухэр адыриIагъэх.

КъалэмкIэ гъэсэныгъэ зыщарагъэгъотырэ организациехэр къэзыухыхэрэ нэбгыри 148-мэ а ушэтыныр аты. Аудиторие 18-у агъэнэфагъэм щыщэу 1-р медицинэ постым пэблагъэу щыт, зипсауныгъэкIэ пыч зиIэ­хэм апае ар агъэнэфагъ.

«Къэралыгъо ушэтын зыкIым амал къеты тихэгъэгу исыд фэ­дэрэ апшъэрэ еджапIи чIэхьанхэмкIэ. Арышъ, тапэкIи Адыгеим гъэсэныгъэм иIоф зэрэщызэхэщагъэм къыкIимычыным, нахьышIу ар хъуным мэхьанэшхо иIэу щыт. Мафэ къэс ащ Iоф дэтэшIэ, еджапIэхэр къэзыухыхэрэм агукIэ нахь зыфэщэгъэхэ сэнэхьатхэр аIэ къырагъэхьанхэм зэкIэ фытегъэпсы­хьагъэу щыт. Мыщ дакIоу къы­­хэгъэщыгъэн фае къэралыгъо ушэтын зыкIыр зыщатыщт чIы­пIэхэр кIэлэцIыкIухэмкIэ Iэ­рыфэгъоу щытынхэ, яшIэныгъэ зынэсырэр къагъэлъэгъонымкIэ амалышIоу хъунхэ зэрэфаер. А Iофыгъом ренэу тынаIэ тетэгъэты, Рособрнадзорми ащкIэ гъусэныгъэ-зэдэлэжьэныгъэ ды­тиI. Непэ джыри зэ нафэ къытфэхъугъ къэралыгъо ушэтын зыкIыр зыщызэхащэщт пунктхэр республикэм дэгъоу зэрэща­гъэхьазырыгъэхэр», — къы­Iуагъ КъумпIыл Мурат.

Ушэтынхэр мэкъуогъум и 24-м нэс зэрэкIощтхэр къыхэгъэщыгъэн фае. Мы илъэсым пстэумкIи нэбгырэ 1834-рэ ушэтынхэм ахэлэжьэщт.