Лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм ишIуагъэкIэ Адыгэ Республикэм игъогухэм атет лъыплъэн амалхэм ахагъэхъон алъэкIыгъ.

Мы уахътэм ехъулIэу гъогурыкIоным ишапхъэхэм япхыгъэ укъоныгъэхэр къы­хэзыгъэщырэ камерэ 95-мэ Iоф ашIэ.

Ахэр джырэ шэпхъэшIухэм адештэх, гъогухэм ащыхъурэ-ащышIэрэм зэпымыоу лъыплъэнхэм фытегъэпсыхьагъэх. «Ураган-Юг» зыфиIорэ лъэпкъым фэдэу комплекс 57-рэ ыкIи «Арена» зыфиIорэм фэ­дэу 38-рэ тигъогухэм атырагъэуцуагъэх.

2020-рэ илъэсым мы лъэпкъ проектым къыдыхэлъытагъэу Адыгеим ишъолъыр кIэу камерэ 56-рэ щагъэуцугъ: федеральнэ мэхьанэ зиIэхэм — камерэ 32-рэ, шъолъыр мэхьанэ зиIэхэм — 5, чIыпIэхэм — 19.

— Фото-видеофиксацием исистемэ зыкI республикэм ишъолъыр щагъэпсыным пае икIыгъэ илъэсым, мэлылъфэгъум «АР-м гъогурыкIоныр щынэгъончъэнымкIэ и Гупчэ» агъэпсыгъ. ЧIыпIэ зы­гъэIорышIэжьыпIэ органхэм къаIахыжьхи, камерэ 39-рэ Гупчэм ыгъэIорышIэнхэу хагъэхьажьыгъэх, — еIо гупчэм идиректорэу Д. Аргун. Лъэпкъ проектэу «Щынэгъончъэ ыкIи шэпхъэшIухэм ади­штэрэ гъогухэр» зыфиIорэм хэхьэрэ шъо­лъыр проектэу «Гъогу хъызмэтым хэхъоныгъэ ышIыным изэхэт амалхэр» зыфиIорэм къыдыхэлъытагъэу сомэ миллион 98-рэ 2021-рэ илъэсым къатIупщыщт. Ащ ишIуа­гъэкIэ камерэ 19 ыкIи ав­томат шIыкIэм тетэу хьылъэзещэ ав­томобильхэр зыщащэчырэ зы чIыпIэ агъэпсыщтых.

Тызхэт илъэсым, мэлылъфэгъум авто­мобиль гъогоу А-146 «Краснодар —Верхнебаканский» зыфиIорэм къуаджэу АдыгеякIэм икъэгъэзэгъу дэжь камери 2 тырагъэуцуагъ. Адрэ камерэ 17-у гъо­гурыкIоным ишапхъэхэм япхыгъэ укъоныгъэхэр къыхэзгъэщыхэрэр бэдзэогъу мазэм ыкIэм нэс агъэуцущтых.

Хьылъэзещэ автомобильхэр зыщауплъэкIущтхэ пунктыр автогъогоу «Красногвардейское — Улап — Зарево» зыфиIорэм, селоу Еленовскэм игъунэгъоу, щагъэпсыщт. Мы уахътэм ехъулIэу проектнэ IофшIэнхэр макIох, илъэсыр екIыфэ ар аухыщт.

Iэшъынэ Сусан.