Адыгэ Республикэм итеатрэхэм яIофышIэхэм я Союз изэфэхьысыжь-хэдзын зэIукIэ филармонием тыгъуасэ щыкIуагъ.

Союзым ипащэу, Урысыем, Абхъазым, Къэбэртэе-Бэлъкъарым, Пшызэ язаслуженнэ артистэу, Адыгеим инароднэ артистэу Зыхьэ Заурбый 2016 — 2021-рэ илъэсхэм Iофэу ашIагъэм къыхигъэщыгъ хэгъэгу фестивальхэм, театрэм и Илъэсэу 2019-рэ илъэсым Урысыем щыкIуагъэм, нэмыкI Iоф­тхьабзэхэм зэрахэлэжьагъэхэр. Республикэм итеатрэхэм якъэгъэлъэгъонхэм, хабзэм икъулыкъушIэхэм Союзыр зэрадэла­жьэрэм, артистхэм яфэIо-фа­шIэхэм ягъэцэкIэн, кадрэхэм ягъэхьазырын, артист ныбжьыкIэхэр зэрящыкIагъэхэм, теат­рэмрэ цIыфым игъэсэнрэ зэ­рэзэпхыгъэхэм, нэмыкIхэм З. Зы­хьэр къатегущыIагъ. Рес­публикэм и ЛIышъхьэу КъумпIыл Мурат зэхэщэн IофхэмкIэ, Союзым, театрэхэм ящыкIагъэмкIэ IэпыIэгъу къазэра­фэхъурэм, лъэхъаным диштэу Союзым мурадэу иIэхэм, фэшъхьафхэм зэIукIэм хэлажьэ­хэрэр ащигъэгъозагъэх.

Зэхахьэм къыщыгущыIагъэх Урыс къэралыгъо театрэм ирежиссер шъхьаIэу Татьяна Сучковар, Лъэпкъ театрэу И. Цэим ыцIэ зыхьырэм ихудожественнэ пащэ иIэнатIэ зыгъэцакIэу Хьакъуй Аслъан, Лъэпкъ теат­рэм иартистэу Джолэкъо Рэщыд, нэмыкIхэри. Зэхахьэм унэшъо гъэнэфагъэхэр щаштагъэх.

ЗэIукIэгъум хэлажьэхэрэм зыкIыныгъэ ахэлъэу Урысыем итеатрэхэм яIофышIэхэм я Со­юз икъутамэу Адыгэ Республи­кэм щыIэм ипащэу Зыхьэ Заур­бый хадзыжьыгъ. ЕмтIылъ Нурбый.