УФ-м и Президентэу Владимир Путиныр унагъоу сабый зэрысхэм ыкIи кIэлэцIыкIу къыфэхъунэу ежэрэ бзылъфыгъэхэм IэпыIэгъу ятыгъэным фэгъэхьыгъэ хэбзэгъэуцугъэм кIэтхагъ.

Къэралыгъом ипащэ кIэщакIо зыфэхъугъэу УФ-м и Федеральнэ ЗэIукIэ фигъэхьыгъэ Джэпсалъэм къыщигъэнэфагъэхэм ащыщхэм япхырыщын законым зигугъу къыщишIырэр.

Изакъоу сабыир зыпIурэ ным е тым ягъот макIэмэ, кIэлэцIыкIур зэрыпсэун ылъэкIыщт ахъщэ анахь макIэм ызыныкъо фэдиз мазэ къэс къыфэкIонэу ыгъэпсын ылъэкIынэу ащ къыщеIо. 2021-рэ илъэсым ибэдзэогъу мазэ и 1-м къыщыублагъэу кIуачIэ иIэ хъущт, ахъщэ тынэу къыратыщтыр, гурытымкIэ лъытагъэу, сомэ 5650-рэ мэхъу.

Джащ фэдэу илъэсэу тызхэтым иIоныгъо и 1-м къыщегъэжьагъэу кIэлэцIыкIоу зыныбжь илъэси 7-м шIомыкIыгъэр къэсымэджагъэмэ, ащ лъыплъэрэм ибольничнэ проценти 100-у къыфалъытэщт.

Сабый къыфэхъунэу ежэрэ бзылъфыгъэу щыIэныгъэм чIыпIэ къин ригъэуцуагъэм къэралыгъор ахъщэкIэ деIэными Владимир Путиныр кIэщакIо фэхъугъ. Зако­ным къызэрэщыдэлъытагъэмкIэ, ащ фэдэ чIыпIэ ит бзылъфыгъэу медицинэм иучреждение екIуалIи зязыгъэтхыгъэм бэдзэогъум и 1-м къыщегъэжьагъэу мазэ къэс ахъщэ къыфэкIонэу ыгъэпсын ылъэкIыщт. ГурытымкIэ лъыта­гъэу, сомэ 6350-рэ къыратыщтыр.