Ушэтыныр чIыпIэ 20-мэ ащыкIощт
Къэралыгъо кIэух ушэтынхэр я 9-рэ классыр къэзыухыхэрэм урысыбзэмкIэ рагъэжьагъ.
Зэпахырэ узым зыщыухъумэгъэным ишапхъэхэр къыдалъытэхэзэ, мыгъэ экзаменыр мэфитIурэ кIуагъэ — жъоныгъуакIэм и 24-м ыкIи и 25-м. Джыри ащ икIэуххэр кIэлэеджакIохэм ашIэгорэп. Сыда пIомэ мыгъэ республикэм иеджапIэхэм къачIэкIырэр гъэрекIорэм нахьи нахьыб — нэбгырэ 4689-рэ мэхъу. Арышъ, IофшIэнхэм яуплъэкIун мэфэ заулэ ищыкIагъ.
Экзаменым къыдилъытэрэ IофшIэныр гъэцэкIэгъэным такъикъ 235-рэ къыделъытэ. Ушэтыным кIэлэеджакIохэм гущыIалъэхэм анэмыкI щагъэфедэн фитыгъэхэп. УрысыбзэмкIэ ушэтыныр пкIугъэу алъытэным пае балл 33-рэ къэпхьын фае.
Ау Адыгеим и Къэралыгъо аттестационнэ къулыкъу къызэритырэмкIэ,экзаменыр зымытышъухэрэм джыри зы амал яIэщт ар атыжьынэу. Зымытышъугъэхэм, е ушэтыным къемыкIолIэшъугъэхэм, е экзамен ыти, ау къыхьыгъэ оценкэм ымыгъэразэу иIофшIагъэ экспертхэр хэплъэжьынхэу дао иIэу комиссием зыфэзыгъази, икIэрыкIэу ытыжьынэу фитыныгъэ къызэратыгъэхэм Iахь тедзэу къагъэнэфэгъэ мафэхэу мэкъуогъум и 8-м ыкIи и 30-м атыжьын алъэкIыщт.
Я 9-рэ классхэм къачIэкIыхэрэм апае республикэм экзаменхэр зыщатыщтхэ чIыпIэ 20 къыщызэIуахыгъ. АР-м гъэсэныгъэмрэ шIэныгъэмрэкIэ иминистрэ иапэрэ гуадзэу Евгений Лебедевым къызэриIуагъэмкIэ, ушэтынхэр щынэгъончъэу кIонхэм пае зэкIэ ищыкIэгъэ псэуалъэхэмкIэ чIыпIэхэр зэтырагъэпсыхьагъэх. ГущыIэм пае, непэ кIэлэеджакIом зыгорэущтэу телефоныр аудиторием чIихьагъэми, ар ыгъэфедэн ылъэкIыщтэп, ащ фэд гъучIыр къэзыгъотырэ техникэр ыкIи нэмыкIхэр.
Мыгъэ джыри зы кIэ къыхэхьагъ — экзаменымкIэ материалхэр ушэтынхэр зыщыкIохэрэ чIыпIэхэм сканировать ащашIыщтых. Министрэм игуадзэ къызэрэхигъэщыгъэмкIэ, экзамен тыпIэхэр, Роспотребнадзорым ишапхъэхэм атетэу, зэпахырэ узым ылъэныкъокIэ щынэгъончъэнхэу агъэпсыгъэх. ГущыIэм пае, аудиторием нэбгыри 9 нахьыбэ исын фитэп, экзамен IыхыпIэхэр дезинфекцие ашIых, температурэм лъэплъэх.
Къэралыгъо аттестационнэ къулыкъум ипащэу Артем Журавель къызэриIорэмкIэ, мыгъэ ушэтынхэм ахэлэжьэрэ нэбгырэ 4689-м щыщэу 127-р япсауныгъэкIэ ялэгъухэм акIахьэхэрэп. Ахэм апае экзамен IыхыпIэхэм яапэрэ къатхэм атет аудиториехэр къыхахыгъэх, Iэзэн-профилактикэ Iофтхьабзэхэр зыщызэхащэщтхэ классхэри зэтырагъэпсыхьагъэх.
Сихъу Гощнагъу.