ЦIыфым щыIэныгъэм анахь щырищыкIагъэхэм апэIуигъэхьанэу узэ­рыпсэун плъэкIыщт ахъщэ анахь макIэм фэдиз мазэ къэс фэгъэ­кIо­гъэным партиеу «Справедливая Россия — За правду» зыфиIорэр кIэщакIо фэхъугъ.

Мы тхьамафэм ащ фэгъэхьыгъэ пресс-конференцие Уры­сыем ишъолъырхэм зэкIэми ащы­зэхищэгъагъ. Пстэумэ афэ­дэу партием ишъолъыр къутамэу Адыгеим щыIэри ащ хэлэжьагъ.

Къутамэм и Совет ипащэу Александр Лобода Iофтхьабзэр зэрищагъ. Ащ къызэриIуагъэмкIэ, ахъщэ тыныр, «справедливый базовый доход» ащ зэре­джагъэхэр, зигъот макIэу къэралыгъом исым къыщыгъэкIэгъэным фытегъэпсыхьагъэхэм зэу ащыщ.

— ТхьамыкIэу псэоу къэралыгъом исым ипчъагъэ бэкIэ нахь макIэ хъунэу тыфай. Зэпахырэ узэу дунаир зэлъызыкIугъэм цIыфхэр зыхихьэгъэ кризисым къыхэкIыжьынхэмкIэ мы ахъщэ тедзэр IэпыIэгъу­шхо афэхъущт. Къэралыгъом исым щыщэу нэбгырэ миллион 18 фэдизмэ ар къашъхьэпэщт, — къыIуагъ ащ.

Пресс-конференцием къызэ­рэщаIуагъэмкIэ, проектыр апэу зигъот макIэхэм, сабыибэ зиIэ унагъохэм, бзылъфыгъэ шъхьэзакъоу сабый зыпIухэрэм, пен­сионерхэм анэсыщт. Ахэм IэпыIэгъу нахь ящыкIагъ. Ахъщэ тедзэу цIыфхэм аIэкIахьэрэм ишIуагъэкIэ псэупIэ-коммунальнэ фэIо-фашIэхэм апкIэ зымытышъоу чIыфэ зытелъхэм ар апщыныжьын алъэкIыщт. Хъыз­мэтшIапIэу ахэр зыгъэцакIэ­хэ­рэм яахъщэ аIэкIэхьажьымэ, нахьыбэу шIуагъэ къатэу Iоф ашIэщт.

Ахъщэ тыныр унагъохэмкIэ IэпыIэгъушхо зэрэхъущтыр пресс-­конференцием къыщы­хагъэщыгъ. Ау ащ федэу къы­хьырэр охътэ кIэкIым къемы­Iыхыным пае, уасэхэр дэмыкIоенхэм унаIэ тетын фаеу алъытагъ.

— ХэбзэIахьхэм ягъэнэфэн, якъэугъоин, лъыплъэн ыкIи гъэ­IорышIэн Iофхэм ясистемэ гъэ­кIэжьыгъэнхэм афытегъэпсы­хьэгъэ Iофэу шIэгъэн фаер пар­тием къыгъэнэфагъ. Ахэр пхырыщыгъэ хъумэ, ахъщэ ты­нэу кIэщакIо зыфэхъугъэр къыз­хэкIыщтыри къэхъущт. ЦIыфхэм ащ тетэу ягъот хахъомэ, нахьыбэу щэфэщтых, сатыум зиу­шъомбгъущт, етIани яшIэныгъэ хагъэхъоным фэбэнэщтых. А зэпстэур экономикэм хэхъоныгъэхэр ышIынхэм фэIорышIэщт, — къыIуагъ Александр Лобода.

ХЪУТ Нэфсэт.