ПсышIопэ районым икIэлэцIыкIу-ныбжьыкIэ спорт еджапIэу N 6-м итренер-кIэлэегъаджэу Мухьарбек Гариевым илъэс 40 хъугъэу исэнэхьаткIэ Iоф ешIэ.

Темыр Осетием — Аланием икъалэу Беслан къыщыхъугъэ М.Гариевым Шэхапэ нэбгырэ шъэ пчъагъэ щигъэсагъ. Физкультурэм, спортым апыща­гъэхэр бэ мэхъух. КIэлэеджа­кIохэм тренер-кIэлэегъаджэу къахэкIыгъэр 20-м нахьыб.

М. Гариевыр футболымкIэ зэнэкъокъухэм ахэлажьэзэ, нэпэеплъ шIухьафтын пчъагъэ къыфагъэшъошагъ. IофшIэным иветеран илъэс 72-рэ ыныбжьми, рэхьатэу унэм исынэу фаеп. КIэлэцIыкIухэм гукIэ афэщагъ, шIу афишIэ шIоигъу. ШэхэкIэ­ишхом щыщэу, Шэхэпэ мэзхъыз­мэтшIапIэм илъэс 30-м ехъоу ипащэу Къэбж Рэмэзан нэIуасэ зыфэхъум, щыIэныгъэм еплъыкIэу фыряIэр къызэфаIотагъ. Р. Къэбжым футболыр шIогъэшIэгъоныгъ, кIэлэцIыкIухэр зэнэкъокъухэм ахэлэжьэнхэм фэшI мылъкукIэ IэпыIэгъу къафэ­хъоу ригъэжьагъ. Бэ темы­шIэу Шъачэ илъэпкъ парк командэм спонсорэу иIэ хъугъэ.

ПсэупIэ мыинэу Шэхапэ ифутбол командэ Шъачэ изэнэкъокъухэм ахэлажьэзэ гъогогъуи 3 апэрэ чIыпIэр къы­щыдихыгъ. Аныбжьхэм ялъытыгъэу Краснодар краим изэнэ­къокъу текIоныгъэр къыща­хьыгъ. Къыблэ шъолъырым изэIукIэ­гъухэм хагъэунэфыкIырэ чIыпIэр къыщыдахыгъ.

Дунэе зэIукIэгъоу Варшавэ щыкIуагъэм хэлэжьагъ, Санкт— Петербург, Севастополь ащызэхащэгъэ зэIукIэгъухэм хагъэу­нэфыкIырэ чIыпIэхэр къащыдихыгъ.

IофшIэным иветеранэу, Шэхэпэ мэзхъызмэтшIапIэм илъэс 30-м нахьыбэрэ ипэщагъэу, гукIэгъу зыхэлъ цIыфышIум игъонэмысэу идунай зехъожьым, унагъом икъин ныбджэгъухэм даIэтыгъ.

Рэмэзан ыкъоу Муратэ ятэ иIофшIагъэ лъегъэкIуатэ, Шэхэпэ мэзхъызмэтшIапIэм ипащ.

— КIэлэцIыкIу футболым нахь зиушъомбгъуным фэшI Къэбж Рэмэзан ишIушIагъэ мэхьэнэ ин етэты, — къытиIуагъ М. Га­риевым. — Рэмэзан фэгъэхьыгъэ шIэжь зэнэкъокъур апэрэу жъоныгъуакIэм и 5-м, ТекIоныгъэм и Мафэ ипэгъокIэу футболымкIэ зэхэтщагъ.

КIэлэеджакIохэм шIэжь яIэным, шэн-хабзэхэр зэрагъэшIэнхэм, физкультурэм ыкIи спортым апыщагъэхэм япчъагъэ хэхъоным фэшI зэнэкъокъухэр тапэкIи футболымкIэ зэхащэщтых.

Р. Къэбжым фэгъэхьыгъэ апэрэ зэIукIэгъухэм Солоники щыщхэм текIоныгъэр къыщыдахыгъ. Шъачэ илъэпкъ ипарк ятIонэрэ чIыпIэр къыдихыгъ, Тыгъэмыпс иешIакIохэр ящэнэрэ хъугъэх.

Ныбэ Анзор.