Славян тхакIэм ыкIи культурэм лъапсэ афэзышIыгъэхэу шыихъхэу Кириллрэ Мефодийрэ я Мафэ славян дунаим игъэкIотыгъэу илъэс къэс щыхагъэунэфыкIы.

Ащ фэгъэхьыгъэу тэ ти­рес­публики Iофтхьэбзэ зэфэшъхьаф­хэр щырекIо­кIыгъэх. Ахэм ащыщ гуманитар ушэтынхэм апылъ Адыгэ республикэ институтым щыкIогъэхэ я XIV-рэ чIыпIэ научнэ егъэджэнхэр. Ахэр зэхищагъэх институтым славян-­адыгэ культурнэ зэпхыныгъэ­хэмкIэ от­делым. Онлайн шIыкIэм тетэу кIогъэ Iофтхьабзэм хэлэжьагъэх Мыекъуапэ имызакъоу Краснодар, Черкесскэ, Ермэлхьаблэ, Луганскэ ыкIи нэмыкI чIы­пIэ­хэм ащыщхэ шIэныгъэлэжьхэр. Ахэр научнэ-ушэтэкIо гупчэхэм, институтхэм яIофышIэх, тарихълэжьых, этнографых, культурологых, искусствоведых, Урыс Православнэ Чылысым илIыкIох ыкIи нэмыкIых.

Егъэджэнхэр анахьэу зы­фэ­гъэхьыгъагъэхэр славян­адыгэ культурэ зэпхыныгъэ­хэр, ахэм къакIугъэ гъогур, республикэм щыпсэухэрэ лъэпкъхэм ядуховнэ байныгъ ыкIи нэмыкI лъэныкъох.

Видео научнэ егъэджэнхэр къызэIуихыгъэх гумани­тар ушэтынхэм апылъ респуб­ликэ институтым идирек­то­рэу ЛIыIужъу Адамэ. Со­цио­логие шIэныгъэхэмкIэ докторэу, РАН-м социологиемкIэ и Институт иотделэу Краснодар щыIэм ипащэу Хьагъур Айтэч ишIуфэс пса­лъэ ащ къыкIэлъыкIуагъ.

Ахэм ауж къэгущыIагъэх МыекъуапэкIэ шIэныгъэлэжьхэу Наталья Денисовар, Евгений Саловыр, Тхьагъэпсэу Галинэ, Тэу Ну­риет, ГъукIэлI Зухра, Шэу­джэн Тэмарэ, ЧеркесскэкIэ Наталья Кратовар, Наталья Соловьевар, Краснодар щыщэу Олег Матвеевыр, ЛуганскэкIэ Юрий Коломойцевыр, ЕрмэлхьаблэкIэ Къурэ Нурбый ыкIи нэмыкI­хэр. ЗэкIэмкIи егъэджэн­хэм нэбгырэ 16 къащыгущыIагъ.

ЗэхэщакIохэм къызэра­IуагъэмкIэ, ахэм ястатьяхэр къызыдэхьащтхэ сборник къыдэкIыщт.

Сихъу Гощнагъу.