БлэкIыгъэ тхьамафэм УФ-м и Къэралыгъо Думэ сэкъатныгъэ зиIэхэм япенсие ыкIи социальнэ ахъщэ тынхэм ащыщхэм ягъэнэфэн нахь къызэрыкIоным фэгъэхьыгъэ хэбзэгъэуцугъэр щаштагъ. НахьыпэкIэ сэкъатныгъэ зиIэ хъугъэм пенсиер фагъэнэфэным пае чэзыухэм ахэсын, лъэIу тхылъыр, нэмыкIэу ищыкIагъэ­хэр ытынхэ фаеу хъущтыгъ. Iофыр нахь афэгъэпсынкIэгъэным, цIыфэу зипсауныгъэ къыщыкIагъэм е ащ игупсэхэм къулыкъушIэпIэ пчъагъэ къызэпакIухьэзэ тхылъхэр къызэраугъоихэрэр техыжьыгъэным кIэщакIо фэхъугъэр УФ-м и Президентэу Владимир Путиныр ары.

ГъэрекIо зэпахырэ узэу дунаир зэлъызыкIугъэм илъэхъан цIыфхэр нахь макIэу зэхэхьанхэм пае пэIудзыгъэ шIыкIэм тетэу, медицинэ учреждением къыгъэхьазырыгъэ тхылъхэм къапкъырыкIыхэзэ, сэкъатны­гъэу цIыфым иIэр зыхахьэрэ купыр фагъэнэфэнэу, пенсиери ащ тетэу къыфалъытэнэу Президентым унашъо къышIыгъагъ. Ар лъэшэу цIыфхэм къызэра­шъхьэпагъэр уахътэм къыгъэлъэгъуагъ.

БлэкIыгъэ мэлылъфэгъу мазэм Владимир Путиныр Джэпсалъэу къызэджагъэми мы Iофым къыщыфигъэзэжьи ащ фэдэ шIыкIэр хабзэ ашIынэу, 2022-рэ илъэсэу къэкIощтым къыщегъэжьагъэу цIыфхэм къа­мычъыхьэу, тхылъхэр къамыугъойхэу, «зы шъхьангъупчъэ» шIыкIэкIэ федеральнэ пособиехэр, пенсиехэр, социальнэ ахъщэ тынхэр, нэмыкI фэ­Iо-фашIэхэр зэкIэ агъэпсынхэ амал яIэным къыфэкIонхэу Пра­вительствэм пшъэрылъ къыфишIыгъ.

Джы мары законэу аштагъэм къызэрэщиIорэмкIэ, медико-социальнэ уплъэкIунхэм цIыфым сэкъатныгъэ зэриIэр къагъэнэфагъэмэ, а къэбарыр зипсауныгъэ пыч фэхъугъэхэм яфедеральнэ реестрэ дагъэхьащт. ПенсиехэмкIэ фондым испециалистхэр ащ къыпкъырыкIыхэзэ пенсиер фагъэнэфэщт. ЦIыфым тхылъхэр ыугъоинхэу, чэзыухэм ахэсынэу, ары пакIошъ, фондым екIолIэнышъ, лъэIу тхылъыр ытынэу ищыкIэгъэжьэп.