Эпидемиологием изытет нахьышIу хъугъэ нахь мышIэми, коронавирусыр зэкIэкIопагъэу плъытэныр тэрэзэп. Ар хэтрэ цIыфи къыпыхьаным ищынагъо джыри щыI. Мыщ упэшIуекIонымкIэ анахь шъхьаIэу щытыр узым иммунитет фыуиIэныр ары. АщкIэ апэрэ IэпыIэгъур прививкэ игъом зябгъэшIыныр ары.

Коронавирусым пэшIуекIорэ вакцинэхэр районым къызэрэIэкIэхьагъэхэм къуаджэм щырыгущыIэхэу Гъонэжьыкъо Рэмэзан зэхихыгъ. Ащ ишIуагъэ къызэрэкIощтым игугъу ашIыщтыгъэ. Илъэс зэкIэлъыкIохэм Рэмэзан гриппым пэшIуекIорэ прививкэ заригъэшIыщтыгъэ, ащ къыхэкIэу мы вакцинэми цыхьэ фишIыгъ. Район гупчэу Пэнэжьыкъуае дэт сымэджэщым прививкэ зыщашIырэ пунктыр къы­зэрэщызэIуахыгъэр тигущыIэгъу зэригъэшIагъ.

Сымэджэщым цIыфыбэ къыщызэрэугъоигъагъ. Зыныбжь нахь хэкIотагъэхэри бэу къызэ­рэкIуагъэхэм Рэмэзан гу лъитагъ. Илъэс зэкIэлъыкIохэм врачэу Iоф зышIэгъэ, зыныбжь илъэс 80-м ехъугъэ Любовь Зинченкэм прививкэ ышIынэу къэкIуагъэу зелъэгъум, зэрэхэмыукъуагъэр тигущыIэгъу къыгурыIуагъ.

Гъонэжьыкъо Рэмэзан къызэриIуагъэмкIэ, вакцинэр къыхалъхьаным ыпэкIэ медицинэм иIофышIэхэм лъыдэкIуаер, гур, тхьабылыр ауплъэкIугъэх. УпчIэ 20 фэдиз къыратыгъ. Сымэджа­гъэмэ, коронавирусыр къеутэкIыгъэмэ, е ар къызэузы­гъэм гущыIэгъу фэхъугъэмэ, нэмыкI Iофыгъохэми медикхэм защагъэгъозагъ. Ащ нэужым прививкэ ашIынэу агъэкIуагъ.

— ЫпэкIи гриппым пэшIуе­кIорэ прививкэ илъэс къэс зязгъэшIыщтыгъэ, — къеIуатэ Рэмэзан. — Ар IэпыIэгъу къызэрэсфэхъурэр нафэу зэхэс­шIагъ. Прививкэ къызщысхалъхьэрэм къыщегъэжьагъэу пэтхъу-Iутхъу е грипп къысэутэкIыгъэп. Ащ къыхэкIэу мыгъэ къэ­кIогъэ вакцинэми сыгукIэ сыфэхьазырэу сымэджэщым сыкIуагъ. Къысхалъхьэгъэ уцым сигъэсымэджагъэп. Мэфэ 21-рэ зытешIэ нэуж медицинэм иIофышIэхэр телефоным къытеуагъэх. ЯтIонэрэ прививкэм ишIын уахътэ къызэрэсыгъэр сыгу къагъэкIыжьыгъ.

Прививкэм ишIогъэшхо къызэрэкIорэр тигущыIэгъу ышъхьэкIэ ыушэтыгъ. Ащ ишIуагъэкIэ пкъышъолыр лъэшы мэхъу ыкIи узым зэрифэшъуашэу пэуцужьын елъэкIы. Арышъ, пстэуми шъуипсауныгъэ шъуфэсакъ, прививкэ зяжъугъэшI.

Абрэдж Сэтэнай.