Урысые Федерацием и Къэралыгъо Думэрэ Адыгэ Рес­публикэм и Къэралыгъо Совет — Хасэмрэ ахэ­тыщт­хэмкIэ хэдзынхэу мы илъэ­сым Iоныгъом щыIэщтхэр зэрэзэха­щэхэрэм лъыплъэщтхэр зэрэ­рагъэ­джэщтхэ про­граммэр Адыгеим щагъэцакIэу рагъэжьагъ.

Адыгэ Республикэм и Общественнэ палатэрэ Ассоциациеу «Независимый общественный мониторинг» зыфиIорэм ишъо­лъыр къутамэрэ зэгъусэхэу а IофшIэныр зэдагъэ­цакIэ. Респуб­ликэм хэ­дзынхэмкIэ и Гупчэ комиссие илIыкIохэри ащ къы­хэлажьэх. МэфитIу се­минархэр Адыгэ Рес­публикэм ишъолъыр пстэуми ащыкIощтых. Общест­веннэ наблюдатель (лъыплъэкIо) 600 фэдиз агъэ­хьазырынэу ары зэрэ­гугъэхэрэр. Хэ­дзын­хэм къы­зэрякIуалIэхэрэм лъы­плъэгъэнымкIэ Общест­веннэ штаб республикэм щызэхащагъ. Ащ хэхьагъэх общественнэ организацие инхэмрэ эксперт со­обществэмрэ ялIыкIохэр.

2021-рэ илъэсым Iоныгъом и 21-м щыIэщт хэ­дзынхэм ялъэ­хъан хэ­дзыпIэ участкэ 260-м ехъумэ Iоф ашIэщт. Зыми емыпхыгъэ лъыплъакIохэр участкэ пэпчъ щыIэнхэр ары зэхэща­кIохэм анаIэ зытырагъэтыщтыр. «Ситуационнэ гупчэкIэ» зэджагъэхэм хэдзыпIэ чIыпIэхэм яIоф­хэм язытет агъэу­нэфыщт.

Зызщагъэсэрэ семинар­хэр ащыкIуагъэх Адыгэ­къалэ, Теуцожь ыкIи Красногвардейскэ районхэм. ЛъыплъакIохэм пшъэ­рылъ шъхьаIэу яIэр хэдзынхэр тэрэзэу, нэфагъэ хэлъэу рекIо­кIынхэм анаIэ тырагъэтыныр ары.

Зыми емыпхыгъэ общественнэ лъыплъакIохэм япшъэрылъ хэдзыпIэ чIыпIэхэм ыкIи мэкъэ­тыныр зыщыкIощт нэмыкI чIыпIэхэм ащырэхьатыным, зэIу­упIэныгъэхэм ежьхэ- ри ахэщагъэхэ мыхъунхэм анаIэ тырагъэ­тыныр. Участкэ хэдзэкIо комиссиехэм, СМИ-хэм ялIыкIо­хэм, джащ фэдэу къэралыгъо хабзэм икъулыкъу­хэм ялIыкIохэм зэгуры­Iоныгъэ-гъусэныгъэ адыряIэным анаIэ тырагъэтын фае.

Семинархэм къякIуа­лIэ­хэрэм джырэкIэ кIуачIэ зиIэ хэбзэ­гъэуцугъэм фэ­хъугъэ зэхъокIыныгъэхэм защагъэгъозэн ыкIи правовой шIэныгъэ зэрагъэ­гъо­тын алъэкIыщт.