ЖъоныгъуакIэм и 19-м къыщегъэжьагъэу и 21-м нэс «Математическая регата» зыцIэ зэнэкъокъур республикэм щыкIуагъ. Мы илъэсым ар я 10-у зэхащэ.

Мыекъуапэ ыкIи рес­публикэм ирайонхэм къа­рыкIыгъэ кIэлэеджакIохэр мы мафэхэм хьисапымкIэ зэнэкъокъугъэх. Рес­пуб­ликэ естественнэ-хьисап еджапIэр ары Iоф­тхьабзэм кIэщакIо фэхъугъэр.

Хьисапыр зикIэсэ ныбжьыкIэхэр командэ-командэу гощыгъэхэу зэнэкъо­къугъэх. Я 6 — 7-рэ клас­схэр, я 8 — 9-рэ классхэр ыкIи я 10 — 11-рэ классхэр ары зызыу­шэтыгъэхэр.

Зэнэкъокъур уцугъуиплIэу гощыгъагъэ. Уцугъо пэпчъ задачищ къашIынэу щытыгъ. Такъикъ 30-м къы­кIоцI IофшIэныр агъэцэкIэныр япшъэрылъыгъ.

Адыгэ къэралыгъо университетым хьисапымкIэ ыкIи компьютернэ технологиехэмкIэ ифакультет истудентхэр Iофтхьабзэм изэхэщэн ыуж итыгъэр. Жюрим хэтыгъэхэр Рес­публикэ естественнэ-хьисап еджапIэм ыкIи АКъУ-м икIэлэегъаджэхэр ары. Хабзэ зэрэхъугъэу, зэ­нэ­къокъум хэлэжьагъэхэм, хьисапым джыри нахь фэ­щагъэ хъунхэм фэшI, роликхэр къафагъэлъэ­гъуагъэх.

Зэфэхьысыжьхэм къызэрагъэлъэгъуагъэмкIэ, я 6 — 7-рэ классхэмкIэ апэрэ чIыпIэр къыдэзыхыгъэр Мыекъопэ лицееу N 19-м икоманд, я 8 — 9-рэ классхэмкIэ анахь дэгъоу зыкъэзыгъэлъэ­гъуагъэр Мыекъопэ гимназиеу N 22-м икIэлэ­еджакIохэр ары. Я 10 — 11-рэ классхэмкIэ те­кIоныгъэ къыдэзыхыгъэр Мыекъопэ лицееу N 8-м икоманд.

ТекIоныгъэ ыкIи ха­гъэунэфыкIырэ чIыпIэхэр къыдэзыхыгъэхэм диплом­хэмрэ шIухьафтынхэмрэ афагъэшъошагъэх.

ДЕЛЭКЪО Анет.