Районым икъэзэкъ обществэ ипащэ хэдзыгъэным фэ­гъэ­хьыгъэ зимычэзыу зэхахьэ псэупIэу Джаджэм щыкIуагъ.

Пшызэ икъэзэкъыдзэ ипащэ игуадзэу Сергей Захаровыр, Адыгэ Рес­публикэм и ЛIышъхьэ ыкIи иминистрэхэм я Кабинет яадминистрацие ипащэу Владимир Свеженец, Джэджэ районым иад­министрацие ипащэу Андрей Таранухиныр, дин IофышIэу Тэу Сергий, лIы­­кIо къэзэкъхэр зэха­хьэм хэлэжьагъэх.

Къэзэкъ обществэм ипа­щэу хадзымэ ашIои­гъоу Виктор Гречкэ къагъэлъэгъуагъ. Ащ мурадэу иIэхэр къыIотагъэх. Обществэм хэт къэзэкъхэм япчъагъэ хэгъэхъо­гъэным, къэзэкъ дзэ-патриотическэ клуб зэхэ­щэгъэным, районым зэкIэ иеджапIэхэм къэзэкъ классхэр къащызэIухы­гъэнхэм, районым иэкономикэ къэIэтыгъэным, нэмыкI Iофыгъохэм зэ­рапылъыщтым зэхахьэм хэлажьэхэрэр ащигъэгъозагъэх.

Сергей Захаровыр, Мые­къуапэ икъэзэкъхэм яотдел ипащэу Александр Даниловыр, Андрей Та­ранухиныр, нэмыкIхэри къэгущыIагъэх.

Адыгэ Республикэм и ЛIышъхьэу КъумпIыл Мурат ыцIэкIэ зэхахьэм къы­щыгущыIагъ Владимир Свеженец. Пшызэ икъэзэкъыдзэ, Джэджэ районым икъэзэкъхэм яобществэ IофшIэным амалы­шIухэр зэрэщагъэфедэ­хэрэр, Джэджэ районым ипащэу Андрей Таранухиныр нахьыпэкIэ къэзэкъ обществэм хэтэу цIыфхэм язэхэщэнкIэ щысэшIу къы­зэригъэлъагъощтыгъэр къыхигъэщыгъэх.

Зэхахьэм хэлажьэхэрэм зыкIыныгъэ ахэлъэу Виктор Гречкэ Джэджэ районым икъэзэкъ обществэ ипащэу хадзыгъ, цыхьэу фашIыгъэр дэгъоу ыгъэцэкIэнэу фаIуагъ.

Екатерина Загорулько.

Мыекъопэ къэзэкъ отделым ипащэ игуадз.

Сурэтым итыр: Виктор Гречкэ зэхахьэм хэлажьэ.