Шъуяплъынэу шъурагъэблагъэ
Москва хэкум и Химкинскэ драматическэ театрэу «Тэ тиун» зыфиIорэм игастроль инхэр Мыекъуапэ жъоныгъуакIэм и 26 — 29-м щэкIох.
Урысыем культурэмкIэ и Министерствэ иунашъо телъытэгъэ Iофтхьабзэм къыпкъырыкIызэ, федеральнэ къэралыгъо IофшIапIэу «Росконцертым» «Гастроль инхэр» зэхещэх.
Адыгэ Республикэм и Къэралыгъо Камернэ музыкальнэ театрэу Хьанэхъу Адам ыцIэ зыхьырэм Химки итеатрэ икъэгъэлъэгъонхэр щыкIощтых.
А. Н. Островскэм ипьесэ техыгъэ къэгъэлъэгъонэу «ШIулъэгъур ыкIи картхэр» жъоныгъуакIэм и 26-м ыкIи и 28-м театрэм щыкIощт.
«Клубничное королевство» зыфиIорэ пшысэр и 27-м къагъэлъэгъощт.
Чэтыум иунэ фэгъэхьыгъэ спектаклэр и 29-м къагъэлъэгъощт, ари пшысэу щыт.
«Клубничное королевствэр» лIыгъэм, гукIэгъум, цIыфым уфэгумэкIыным афэгъэхьыгъ. Мэзым ехьылIэгъэ пшысэр цумпэхэм, хьацIэ-пIацIэхэм, цIыфыгъэм диштэрэ шIушIагъэхэм къатегущыIэ. Режиссерэу Сергей Постнэм къэгъэлъэгъоныр ыгъэуцугъ.
Чэтыум иунэ ехьылIэгъэ пшысэри гукIэгъум, шIушIагъэм яхьылIагъ. Арэу щытми, шэн-зекIокIэ дэйхэр зезыхьэхэрэм сыдэущтэу уяплъыщта? Мыхъо-мышIагъэу зэрихьагъэр цIыфым фэбгъэгъун плъэкIыщта?
Самуил Маршак ытхыгъэм техыгъэ къэгъэлъэгъоныр Юрий Зайцевым ыгъэуцугъ. Илъэси 4 зыныбжь кIэлэцIыкIухэм къащегъэжьагъэу ыкIи нахьыжъхэм апае къэгъэлъэгъоныр театрэм щагъэуцугъ.
«ШIулъэгъур ыкIи картхэр» зыфиIорэр режиссерэу Владимир Красовскэм ыгъэуцугъ. Пьесэр А. Н. Островскэм ытхыгъ. Урыс драматургием иклассикэ хэхьэгъэ къэгъэлъэгъоныр комедиеу щыт.
Унагъом, зэшъхьэгъусэхэм язэфыщытыкIэ, щыIэныгъэм изэхъокIыныгъэхэм афэгъэхьыгъэ къэгъэлъэгъоным я XVI-рэ дунэе фестивалэу «Золотой Витязь» ыIоу 2006-рэ илъэсым щыIагъэм диплом къыщыфагъэшъошагъ.
Илъэс 14 зыныбжьхэм ыкIи нахьыжъхэм ателъытэгъэ къэгъэлъэгъоным уегъэщхы, куоу урегъэгупшысэ, уеплъынкIэ гъэшIэгъонэу гъэпсыгъэ.
ЗэлъыкIощтых
— Чъэпыогъу мазэм иаужырэ мафэхэм Химки тыкIощт, — къытиIуагъ Адыгэ Республикэм и Къэралыгъо Камернэ музыкальнэ театрэу Хьанэхъу Адам ыцIэ зыхьырэм ихудожественнэ пащэу, Урысыем, Адыгеим искусствэхэмкIэ язаслуженнэ IофышIэшхоу Сулейманов Юныс. — КъэгъэлъэгъонхэмкIэ тызэхъожьызэ, искусствэм ихэхъоныгъэхэм нахьышIоу защыдгъэгъозэщт, тизэфыщытыкIэхэр дгъэпытэщтых.
Адыгеим и Камернэ музыкальнэ театрэ Москва хэкум мюзиклэу «Ослепленные», кIэлэцIыкIухэм апае пшысэмэ атехыгъэхэр къыщигъэлъэгъощтых. Театрэр зыгу рихьыхэрэр Мыекъуапэ щыкIощтхэ къэгъэлъэгъонхэм яплъынхэу зэхэщакIохэм рагъэблагъэх. Телефонхэр: 52-09-22; 8-918-421-60-92; 8-962-762-91-65.