Ным е тым изакъоу сабыир епIумэ, хэушъхьафыкIыгъэу IэпыIэгъу етыгъэ­ным, сабый къыфэхъунэу ежэрэ бзылъфыгъэу щыIэныгъэм чIыпIэ къин ри­гъэуцуагъэм къэралыгъор ахъщэкIэ деIэным, кIэлэцIы­кIоу зыныбжь илъэси 7-м шIомыкIыгъэр къэсымэджагъэмэ, ащ лъыплъэрэм ибольничнэ проценти 100-у къыфэлъытэгъэным афэгъэхьыгъэ унашъохэр УФ-м и Президентэу Владимир Путиным и Джэпсалъэ къыщишIыгъэх.

УФ-м и Правительствэ и Тхьаматэу Михаил Мишустиныр ахэм япхырыщын зэрэлъыкIуатэрэм къы­тегущыIэзэ, пшъэрылъхэр гъэцэкIэгъэнхэм фэшI хэбзэгъэуцугъэхэм зэхъо­кIыныгъэхэр афашIынхэу законопроектыр зэрагъэ­хьазырыгъэр къыIуагъ. Фе­дерациемкIэ Советым ащ дыригъэштагъ.

КIэлэцIыкIур изакъоу зыпIурэ ным е тым 2021-рэ илъэсым ибэдзэогъу и 1-м къыщыублагъэу мазэ къэс ахъщэ тын фэкIощт. Ар, гурытымкIэ лъытагъэу, сомэ 5650-рэ зэрэхъущтыр. Бзылъфыгъэу сабый ежэхэрэм мазэ къэс сомэ 6350-рэ къафэкIонэу агъэ­псын алъэкIыщт.

Джащ фэдэу диспан­серизацием джыри нахь зы­рагъэушъомбгъунэу, илъэсэу тызыхэтым ибэ­дзэогъу мазэ и 1-м ар атIупщынэу Правительст­вэм, псауныгъэм икъэу­хъумэнкIэ Министерствэм ыкIи шъолъырхэм япащэ­хэм Президентым къари­Iуагъ. Мы уахътэм программэу ащ фытегъэпсы­хьагъэр Правительствэм егъэхьазыры.

Зэпахырэ узэу дунаир зэлъызыкIугъэм епхыгъэ пандемием илъэхъан бизнес цIыкIум ыкIи гурытым ащылажьэхэрэм чIэ­нэгъэшхохэр амышIынхэм, цIыфхэм яIофшIапIэхэр къызэтенэнхэм афытегъэ­псыхьагъэу къэралыгъом макIэп ышIагъэр. Арэу щытми, IофшIапIэр зыми чIимынэнэу хъугъэп. Илъэ­сым ыкIэм нэс IофшIэпIэ чIыпIэхэм ябэдзэршIыпIэ зэтыригъэуцожьынэу Владимир Путиным Правительствэм пшъэрылъ фишIыгъ.

Михаил Мишустиным къызэриIуагъэмкIэ, бизнес цIыкIум ыкIи гурытым ащылажьэхэрэм цIыфхэр IофшIапIэм IуамыгъэкIынхэм е ар зищыкIагъэхэр аштэнхэм фэшI фэгъэкIо­тэнхэр къызыдэлъытэгъэ кредитхэр ятыгъэнхэм фэ­гъэхьыгъэ программэм пэIуагъэхьанэу сомэ миллиарди 8 агъэнэфагъ.