Унэе хъызмэтшIапIэу «Вест Энтер­прайз» зыфиIорэр къэлэ гъэ­псы­кIэ зиIэ поселкэу Инэм хэхьэрэ къутырэу Новый садым щэлажьэ.

Ащ ипродукцие фэдэ къыдигъэкIэу Адыгеим нэмыкI предприятие итэп, Урысыем и Къыблэ шъо­лъыр пштэмэ, Ростов хэ­кум зы щэлажьэ, къэралыгъом итыр зэкIэмкIи 12 мэхъу.

«Вест Энтерпрайзым» медицинэм щагъэфедэрэ щыгъынэу зэ нахьыбэ ­зыщыплъэнэу щымытхэр, маскэхэр, бахилэхэр зыхашIыкIырэ шэкI къешIы. Ащ нэмыкIэуи а шэкIыр чIыгулэжьыным, анахьэу хэтэрыкIхэм, цумпэ зэфэшъхьафхэм якъэгъэкIын, етIанэ унэгъо псэуалъэхэм, анахьэу «мебель шъабэ­кIэ» тызаджэхэрэм яшIын, ащагъэфедэ.

Джырэблагъэ предприятием тыщыIагъ, ащ ипащэу Дмитрий Машковскэм зыIудгъэкIагъ, шэкIыр къы­зэрашIырэр къытигъэлъэгъугъ, заушъомбгъунэу зы­зэрагъэхьазырырэр къыт­фиIотагъ. Мы уахътэм хъызмэтшIапIэм нэбгырэ 15-мэ Iоф щашIэ, ау ягу­хэлъхэр пхыращышъухэу, джыри къыдагъэкIыщтым хагъахъомэ, IофшIэпIэ чIы­пIэхэр 50-м нагъэсыщтых.

ЦIыфым ыкIуачIэкIэ зы­пари мы предприятием щашIэрэп. Лъэхъаным ди­штэрэ оборудованиеу, тех­никэу яIэхэм автомати­кэм тетэу Iоф ашIэ. ЕтIа­ни шэкIыр къызэрэдэбгъэ­кIыщт технологием IэкIэ Iоф пшIэнэу къыщыдэлъытагъэп.

Дмитрий Машковскэр мылъкушхуи, IэпыIэгъуи имыIэу зибизнес езгъэ­жьагъэхэм ащыщ. Ар Краснодар къыщыхъугъ, ща­пIугъ, илъэсыбэрэ щы­псэугъ. КъызэрэтфиIота­гъэмкIэ, 1996-рэ илъэсым бизнесым нэмыкI ахъщэ къэгъэхъапIэ зэрэщымыIэр къызыгурэIом, полиэтиленым хэшIыкIыгъэ клеенкэ къыдигъэкIынэу ри­хъухьагъ. Зыпари мы про­изводствэм хишIыкIырэпти, икIэрыкIэу феджэжьи, 1998-рэ илъэсым унэе хъызмэтшIапIэ къызэIуихыгъ. Ежь ыIэкIэ зэхи­гъэу­цуагъ пIоми хъун ста­ноккIэ ригъэжьэгъагъ, етIанэ а лъэхъаным диштэу гъэ­псыгъэ оборудование къы­щэфи, ыгъэуцугъ.

2002-рэ илъэсым щыIэныгъэм Iофхэр къызызэпырегъазэхэм, Адыгеим къэкIожьи, джы зигугъу къэтшIырэ хъызмэтшIапIэр щигъэпсыгъ. 2019-рэ илъэ­сым нэс клеенкэр ари­гъэшIыгъ, ау уахътэр нахь лъыкIуатэ къэс ар зэращэфырэм къыщыкIэщтыгъ. Джащыгъум джы зыпылъхэр къыдигъэкIынэу ыгу къэкIыгъ.

ШэкIым ишIын къызэрыкIоу зэрэщымытыр къыгурыIощтыгъ. Технологиер ежь ышIэщтыгъэп, зышIэрэ цIыфи рихьылIэгъагъэп. Ащ имызакъоу, оборудованиеу ищыкIагъэр ябгъэшIын фаеу щыт, илъэсныкъом къыщымыкIэу ащ изэхэгъэуцон пэлъых. Арэу щытми, Дмит­рий гу тыри­шIыхьи ыуж ихьагъ. Материалыр къызэрэдэбгъэкIыщтым ежь ышъхьэкIэ Китаим кIуи къыфеджагъ, линиеу зэришIыщтыри ащ къы­щищэфыгъ. Изакъоу Iоф ышIэн зэримылъэкIыщтыр къыдилъыти, нэужым клеенкэр языгъэшIыщтыгъэ мастерыр ыщи къыригъэ­джагъ, етIанэ адрэ спе­циалистхэр ежьхэм агъэсэжьыгъэх.

— Мы шэкIым ишIын зетэгъажьэм, коронавирусыкIэр къежьэнышъ, дунаир зэлъикIуным, зэщы­лъэ­гъу щыгъынхэмкIэ, мас­кэхэмкIэ ащ фэдэу щыкIэгъэшхо щыIэ хъуным сегупшысагъэп, — къыIуагъ ащ. — Мэкъумэщ хъыз­мэтым, мебель шIыным апылъхэм ащэфыныр ары нахь сызщыгугъыгъэр, ме­дицинэм пае щыгъын зыдыхэрэр макIэу къыхэлэ­жьэщтхэу сегупшысэщтыгъ.

Ежь зэримыIоу щыIэ­ныгъэм зэпстэур къызэпигъэфагъ. ШэкIым икъыдэгъэкIын зыригъэжьагъэм ыуж илъэсныкъо нахьыбэ темышIэзэ зэпахырэ узым дунаир зэлъикIугъ, мебель шIыными, хэтэрыкI, цумпэ къэгъэкIыными къащыкIагъ, зэщылъэгъу щыгъынхэр, маскэхэр, бахилэхэр ыпэ къишъыгъэх. Ащ тетэу, ежь емыгупшысагъэу, коронавирусыкIэм пэшIуекIогъэным Дмитрий иIахьышхо хилъхьанэу хъугъэ. Дэгъуми, дэими къэшIэгъуай, ау ифедэ къызэрэхэкIыгъэри нафэ. Зэпахырэ узым лъэшэу зиушъомбгъоу къэ­ралыгъо гъунапкъэхэр зэ­фамышIыфэкIэ IэкIыб къэ­ралхэми шэкIыр ащыIуа­гъэкIыщтыгъ, мы уахътэм Урысыем ичIыпIэ зэфэ­шъхьафхэм ащащэфы.

Дмитрий къызэриIуа­гъэмкIэ, джыри къыдагъэ­кIырэм хагъэхъоным пае оборудование ащэфыщт. Ар ыпэкIэ агъэуцугъэм нахьи нахьыкIэжь, зыдэщыт чIыпIэр зэрэгъэ­псы­гъэщтым шэпхъэ гъэнэ­фагъэхэр пылъых. ТызщыкIогъэ уахътэм ар агъэхьазырыгъахэу къытигъэлъэгъугъ. Гъэмафэр имыкIызэ оборудованиер хьазыр хъунышъ, атIупщынэу ары зэрэгугъэхэрэр.

ЛиниякIэр загъэуцукIэ, джыри IофшIэпIэ чIыпIэхэр къатыщтых. Ау ащ Iоф егъэшIэгъэным пае ежьхэм джыри яшIэныгъэ IэкIыбым къыщыхагъэхъощт, етIанэ цIыфэу къаштэхэрэр агъэ­сэщтых.

ШэкIэу къашIыщтыр джы ашIырэм нахь дэгъущт. Ар пчъагъэу зэтелъ, нахь пыт, хашIыкIырэри нахьыб. Къы­дагъэкIырэм зыхагъахъо­кIэ, гъэтIылъыпIэхэри на­хьыбэу ящыкIэгъэщтых. Ахэри тызщыкIогъэ уахътэм агъэхьазырыщтыгъэх.

ХЪУТ Нэфсэт. Сурэтыр Iэшъынэ Ас­лъан тырихыгъ.