ЖъоныгъуакIэм и 22-м, шэмбэт мафэу кIуа­гъэм, еджапIэхэм къачIэкIыхэрэм аужырэ оды­джыныр къафытеуагъ.

Адыгеим иеджапIэхэм ащ фэгъэхьыгъэ мэфэкI Iофтхьабзэу ащыкIуагъэхэм АР-м и Къэралыгъо Совет — Хасэм ипащэхэмрэ идепутатхэмрэ ахэ­лэжьагъэх. Республикэ Парламентым и Тхьаматэу Владимир Нарожнэр Шэуджэн районым ит къутырэу Тихоновым и Краснобашненскэ гурыт еджапIэу N 9-м щыIагъ. Ащ игъусагъэх район администрацием ипащэ игуадзэу Жэмадыкъо Анзоррэ къутырыр зыхахьэрэ Дукмасовскэ псэупIэ кой администрацием ипащэу Василий Шикининымрэ.

Владимир Нарожнэр АР-м и ЛIышъхьэу КъумпIыл Мурат ыцIэ­кIэ мэфэкIым пае къафэгу­шIуагъ, кIэлэегъаджэхэм Iоф мыпсынкIэу ау шIогъэ ин къэзытэу зыфэгъэ­загъэхэр ифэшъуа­шэм тетэу зэрагъэцакIэрэм фэшI «тхьа­шъуегъэпсэу» къариIуагъ, еджапIэм къычIэкIыхэрэм гъэхъэ­гъэ инхэр ашIынхэу къа­фэлъэIуагъ.

— Аужырэ одыджыныр адрэхэм афэдэп, — къыIуагъ Парламентым и Тхьаматэ. — Джы шъо сэнэхьатэу шъуищыIэныгъэ зэшъупхыщтыр къыхэшъу­хы­нэу, шъуинеущырэ мафэ къэ­зыгъэнэфэщт лъэбэкъоу шъу­шIыщтхэр ишъухъухьанхэу шъуа­пэ илъ. ШъуикIэлэегъа­джэхэм шIэныгъэ зэрэшъуагъэгъотыгъэм имызакъоу, шъугупшысэнэу, зыгорэм шъукIэхъо­псынэу, шъуи Хэгъэгу шIу шъу­лъэгъунэу, щыIэныгъэм пэрыо­х­ъоу къыгъэуцухэ­рэм шъуапэшIуе­кIонэу, гухэлъэу шъушIыгъэхэм дэх имыIэу шъуя­кIолIэнэу шъузэрагъэсагъэм сицыхьэ телъ.

Нэужым Владимир Нарожнэм республикэ Парламентым ирэзэныгъэ тхылъхэр зыфагъэшъошэгъэ кIэлэегъаджэхэм ариты­жьыгъэх. Ащ фэдэу къыхагъэ­щыгъэх мы еджапIэм инджылызыбзэмкIэ щезыгъэджэхэрэ Ольга Вирченкэмрэ урысыбзэмрэ литературэмрэкIэ язы­— гъэ­хьырэ Милана Ермаковамрэ.

МэфэкI Iофтхьабзэм ыуж Къэралыгъо Советым — Хасэм и Тхьамати ягъусэу Краснобашненскэ гурыт еджапIэм ищагу сирень къэгъагъэхэр къызпыкIэщтхэ куандэхэр щагъэтIысхьагъэх.

Джащ фэдэу мы мафэм АР-м и Парламент ипащэ игуадзэу Шъэо Аскэр ежь зыщеджагъэу, поселкэу Инэм игурыт еджапIэу N 6-м аужырэ одыджыныр къы­зэрэтеорэм фэгъэхьыгъэ Iоф­тхьабзэу щыкIуагъэм хэлэ­жьагъ.

АР-м и ЛIышъхьэ ыцIэкIэ ар еджапIэм къычIэкIыхэрэм, кIэ­лэ­егъаджэхэм, ны-тыхэм къа­фэ­­гушIуагъ, Парламентым ирэ­зэныгъэ тхылъхэмкIэ къыхагъэ­щыгъэхэм ахэр аритыжьыгъэх.

— Шъузтехьащт гъогур къыхэшъухыным ыпэкIэ обществэм чIыпIэ тэрэз щышъуубытыныр, шъуигупсэхэм кIэгъэкъонышхо шъуафэхъуныр, шъуи Хэгъэгу, Адыгеир шIу шъулъэгъунхэр анахь шъхьаIэу зэрэщытхэм шъуегупшысэн фае, — къыIуагъ ащ еджапIэм къычIэкIыхэрэм зафигъазэзэ.

Аужырэ одыджыныр къызэрэтеорэм фэгъэхьыгъэ зэхахьэхэр илъэс къэс зэхащэхэми, ахэм уясэжьын, угу рэхьатэу уахэлэжьэныр зэрэмыпсынкIэр, анахьэу еджапIэр къэзыухыхэрэм ар зэрэзэхашIэрэр ащ къыхи­гъэщыгъ.

Линейкэм ыуж «Сад памяти» зыфиIорэ Iофтхьабзэм къыды­хэлъытагъэу еджапIэм ищагу чъыгхэр щагъэтIысхьагъэх. Шъэо Аскэри ащ хэлэжьагъ. (Тикорр.).