Бзылъфыгъэм ищыIэныгъэ зэхъокIыныгъэшхохэр зэрэфэхъугъэхэр гуры­Iогъуаеп. ЩыIэныгъэм ащ чIыпIэу щиубытырэм зыкъиIэтыгъ, сыд фэ­дэрэ зэхъокIыныгъи дырегъаштэ, мыхъунхэм апэуцужьы.

Бзылъфыгъэ форумэу «Крылья» зыфиIорэр мыгъэ апэрэу республикэм щызэхащагъ. Бзылъфыгъэхэм ящыIэкIэ-­псэукIэ нахьышIу шIыгъэныр, ягъэхъагъэхэр къагъэлъэгъонхэр, яшIэныгъэхэм ахагъэхъоныр ары пшъэрылъ шъхьаIэу зэхэщакIохэм зыфагъэуцужьырэр. Форумыр мэфэкI шъып-къэу кIуагъэ. Ар къэзыгъэдэ­хагъэхэм ащыщых къэшъокIо купхэу «Мыекъуапэ инэфылъэ­хэр», «Шпаргалкэр», ансамблэу «Концертино», нэ­мыкIхэри.

Москва, Санкт-Петербург, Шъачэ, Краснодар ыкIи рес­публикэм ирайон зэфэшъхьаф­хэм къарыкIыгъэ бзылъфыгъэ предпринимательхэр форумым къекIолIагъэх.

Ижъырэ адыгэ Iэмэ-псымэхэр хьакIэхэм арагъэлъэгъугъэх. Джащ фэдэу КъокIыпIэм щыпсэурэ лъэпкъхэм яискусствэхэмкIэ Къэралыгъо музееу Мыекъуапэ дэтым къыщызэ­Iуахыгъэ къэгъэлъэгъоныр гъэшIэгъоныгъ: дизайнерхэу Бо­джэкъо Беллэрэ Цурмыт Рузанэрэ яIэшIагъэхэр, адыгэ шъуашэхэр, дышъэидэхэр…

Фестивалым икъызэIухын хэ­лэжьагъэх АР-м культурэмкIэ иминистрэу Аулъэ Юрэ, Урысыем и ЛIыхъужъэу, рес­публикэм и Къэралыгъо Совет — Хасэм идепутатэу Цэй Эдуард, МКъТУ-м иректорэу Къуижъ Саидэ, Красногвар­дейскэ районымкIэ народнэ депутатхэм я Совет ипащэу Анна Выставкинар, унэе предпринимательхэр, активистхэр, бзылъфыгъэ IэпэIасэхэр.

Бзылъфыгъэ Iушэу зэIукIа­гъэхэм лъэгэпIэ гъэшIэгъонхэр зэрэщыIэхэр, ахэм алъыIэсынхэ, унэгъо хъызмэтым зэрэпылъхэм имызакъоу, шIуагъэ къахьэу бэ ашIэн зэралъэкIыщтыр къагурыIуагъ.

Бзылъфыгъэхэр зэдеIэжьхэу, зэдырагъаштэзэ шIум фэкIонхэу, агухэр ащ къыфаIэтынэу ыкIи ахэм аныбжьи, ядини, ялъэпкъи, яIофшIэни ямылъытыгъэу, IофыгъуакIэхэм ауж ихьанхэм, гъэхъэгъэшIухэр ашIынхэм фэщэгъэнхэр ары зэ­хэщакIохэм пшъэрылъ шъхьа­Iэу зыфагъэуцужьыгъэр.

Москва, Санкт-Петербург, Мыекъуапэ, Псыфабэ къарыкIыгъэ бзылъфыгъэхэр Iофтхьабзэм къекIолIагъэхэм гущыIэгъу афэхъугъэх, мастер­-классхэр къатыгъэх.

Светлана Соловьевам декоративнэ-прикладной искусствэм, флористикэм хахьэрэм фэгъэхьыгъэ мастер-классэу къыгъэлъэгъуагъэр гъэшIэгъон дэдагъ, рэзэныгъэ хагъотагъ Елена Лаврентьевамрэ Алена Чимулевамрэ Iанэр зэрифэ­шъуашэу зэрэбгъэдэхэщтым, ащ шапхъэу пылъхэм къатегу­щы­Iагъэх. Бырсыр Асе унагъом икъэухъумэн фэгъэхьыгъэу къэгущыIагъ.

АР-м ибзылъфыгъэхэм я Союз нэужым Iэнэ хъурае зэхищагъ, унагъом мэхьанэу иIэм ащ щытегущыIагъэх. Унагъом хабзэу илъыгъэр нахь къызэреIыхыгъэм, ащ зыкъе­гъэIэтыжьыгъэн зэрэфаер, адыга­бзэм изэгъэшIэн афэ­гъэхьыгъэ гумэкIыгъохэми анэ­сыгъэх. Джащ фэдэу сабыибэ зэрыс унагъохэм джырэ уахътэм язытет лъыплъэгъэн зэрэфаер къаIуагъ. Анахьэу къэгущыIагъэмэ къыхагъэунэфыкIыгъэр сабыир къызэрыхъухьэгъэ унагъом гъэсэныгъэу илъым мэхьанэшхо зэриIэр ары. Сабыим идунэееплъыкIэ къызще­жьэрэр унагъор ары! Хъущтыри, мыхъущтыри, икультури, цIыф­хэм фыщытыкIэу афыриIэри унагъом хабзэу илъыр ары.

Красногвардейскэ районым ибзылъфыгъэхэм я Совет ипащэу Н. В. Дорот «Женщина черкешенка — хранительница семейного очага» зыфиIорэм фэгъэхьыгъэу къэгущыIагъ. Улэпэ коим и Ны Хасэ зэрихьэрэ Iофыгъохэм ащигъэ­гъозагъэх ащ щылэжьэрэ Алыбэрд Аминэт. Ар цIыф гъэ­шIэгъонэу, ышIэрэм пыгъэна­гъэу, зэрэпсаоу ащ зыритэу, гу зэхашIэ хэти фыриIэу, шIум фэ­щагъэу, дахэр игъогогъоу, ахэр зэкIэ итворчествэ щы­пхырищэу щыт. Аминэт усэхэр етхых. Бзылъфыгъэм идэхагъэ, ным ишъэбагъэ, къызщы­хъугъэ Улапэ шIу зэрилъэгъурэр къыреIотыкIы. Пшысэм ухи­щэу му­зей цIыкIу ащ иунагъо щигъэ­псыгъ, ыдэжь къакIохэрэр ижъы­рэ адыгэ щыIакIэм хещэжьых.

ТикомандэкIэ Аминэт гущыIэ етти, къэдгъэгущыIагъ, иусэхэм къяджагъ, ахэр литературабзэм имылъыгъэхэми, къедэIугъэмэ къагурыIуагъэу, лъэшэу гухахъо хагъотагъэу бэрэ Iэгу фытеуагъэх.

Апэрэ бзылъфыгъэ форумэу «Крылья» зыфиIорэр мыхьа­нэшхо зиIэ хъугъэ-шIагъэу щыт. Урысыем ичIыпIэ зэфэшъхьаф­хэм къарыкIыгъэ бзылъфыгъэ цIэрыIохэр зэIукIагъэх.

Мы апэрэ зэIукIэгъур — къа­рыум, нэIосэныгъэм, цIыф гъэшIэгъон дэдэхэм уаIукIэным афэIорышIагъ. ЫпэкIи мыщ фэдэ Iофтхьабзэхэр республи­кэм щызэхащэнэу тэгугъэ.

Красногвардейскэ районым ибзылъфыгъэхэм я Совет ипащэу Н. В. Дорот командэр Мые­­къуапэ нэгъэсыгъэнымкIэ къы­фэгумэкIыгъэхэ Гъубжьэкъо Ти­мур, Ершов Александр, Анна Выставкинам зэрафэразэр къыIуагъ.

Пщыкъэнэ Май.