Адыгеим и ЛIышъхьэу КъумпIыл Мурат Красногвардейскэ районым зыщэIэм социальнэ мэхьанэ зиIэ псэуалъэхэм Iоф зэрашIэрэр ыуплъэкIугъ.

Селоу Красногвардейскэм дэт стадионэу «Олимп» зыфиIорэр зэкIолIэгъэ чIы­пIэхэм зыкIэ ащыщыгъ. «Спорт — норма жизни» зыфиIорэ федеральнэ программэм игъэцэкIэн тегъэ­псыхьагъэу илъэсэу икIыгъэм IофшIэнхэр мыщ щаублагъэх. Проектым изэ­шIохын сомэ миллион 40,4-м ехъу тефэщт, подряднэ организациер — ООО-у «Либерум» зыфи­Iорэр ары.

Спорт псэуалъэм изытет зыщагъэгъуазэ зэхъум щы­Iагъэх Адыгэ Респуб­ликэм илIыкIоу Краснодар краим иадминистрацие ипащэ дэжь щыIэ Александр Наролиныр, Адыгэ Респуб­ликэм физическэ культу­рэмкIэ ыкIи спортымкIэ и Комитет итхьаматэу Дэгужъые Мурат, Красногвардейскэ районым ипащэу Гъубжьэкъо Темур.

Джырэ уахътэм диштэрэ футбол ешIапIэу стадионым хашIыхьагъэм илъэсым къыкIоцI зыщагъэсэн алъэкIыщт. Ащ нэмыкIэу спорткомплексым хэхьэ теннис зыщешIэщтхэр ыкIи лъэныкъуабэмэ афыте­гъэ­псыхьэгъэ джэгупIэр. Джыдэдэм псэолъэшIхэм Iоф зыдашIэрэр къызщы­чъэщт­хэ гъогухэр ары, атлетикэ псынкIэмкIэ дунэе федерацием къыгъэуцурэ пшъэ­рылъхэм адиштэу а гъогур ашIыщт. Урамхэм атырагъэуцорэ тренажери 10 мыщ хэтыщт.

Адыгэ Республикэм и ЛIышъхьэ спорткомитетым ипащэрэ муниципальнэ образованием ипащэрэ пшъэрылъхэр афишIыгъэх трибунэм игъэпсынкIэ, къэзгъэнэфыщтхэм ягъэуцункIэ, стадионым къыпэ­Iулъ чIыпIэр зэтегъэпсы­хьэгъэнымкIэ.

Мы мэфэ дэдэм КъумпIыл Мурат щыIагъ селоу Красногвардейскэм ис­кусствэхэмкIэ кIэлэцIыкIу еджапIэу дэтым. Урысые Федерацием и Президен­тэу Владимир Путиным Джэпсалъэу 2020-рэ илъэ­сым щылэ мазэм и 15-м Федеральнэ ЗэIукIэм фигъэхьыгъэм игъэцэкIэн те­гъэпсыхьагъэу, къэра­лыгъо программэу «Культурэм хэхъоныгъэ егъэшIыгъэныр» зыфиIорэм диштэу сомэ миллиони 6 фэдиз зытефэгъэ игъэкIотыгъэ гъэцэкIэжьын мыщ щыкIуагъ.

КультурэмкIэ министрэу Аулъэ Юрэ къызэри­IуагъэмкIэ, еджапIэу агъэ­кIэжьыгъэм кIэлэцIыкIу 200-м ехъумэ лъэныкъо зэфэшъхьафхэмкIэ зыщагъасэ: музыкэм, къэшъоным, сурэтшIыным ыкIи театральнэ искусствэм. КIэлэеджакIохэр Урысыем ыкIи Адыгеим ащыкIорэ творческэ зэнэкъокъухэм ахэлажьэх, гъэхъэгъэшIу­хэри ашIых.

Адыгеим и ЛIышъхьэ кIэлэцIыкIухэм ахэхьагъ, яIофшIакIэ нэIуасэ зыфи­шIыгъ, кIэлэегъаджэхэми адэгущыIагъ.

«Непэ анахь лъэшэу ты­наIэ зытедгъэтыхэрэм ащыщ культурэр. КIэлэ­еджа­кIохэм гъэсэныгъэ тедзэ зэрэзэрагъэгъотыщтым нэмыкIэу культурэ­-гъэпсэфыпIэ учреждениехэми хэхъоныгъэ ашIыным ты­дэлажьэ. Мы аужырэ илъэс­хэм культурэм и Унэ ыкIи тхылъеджэпIэ пшIы пчъагъэ агъэцэкIэжьыгъ ыкIи кIэхэр ашIыгъэх. ТапэкIи а IофшIэныр лъыдгъэкIотэщт», — къыIуагъ КъумпIыл Мурат.

ИкIэухым республикэм и ЛIышъхьэ Адыгеим культурэмкIэ иминистрэ пшъэ­рылъ фишIыгъ искусст­вэ­хэмкIэ кIэлэцIыкIу еджапIэм иактовэ зал зэтегъэ­псыхьажьын IофшIэнхэр зэкIэ ыкIи еджапIэм къыпэIулъ чIыпIэр нахь дахэ шIыгъэнымкIэ Iофтхьа­бзэ­хэр пIэлъэ кIэкIым къыкIоцI аухынхэм ынаIэ тыригъэтынэу. КультурэмкIэ ыкIи цIыфхэм языгъэпсэфынкIэ Iофтхьабзэхэм нахь зарагъэушъомбгъунэу, ащ щыпсэухэрэр на­хьыбэу ахэм ахагъэлэжьэнхэу нэмыкIхэми пшъэ­рылъ­хэр афишIыгъэх.