«Кешбэк» зыфиIорэ гущыIэр тигъашIэ къызыхэхьагъэр бэшIагъэп. Ар инджылызыбзэм къыхэкIыгъ, имэхьанэ «уиахъщэ щыщ къыпфигъэзэжьыныр» ары къикIырэр. Мы лъэхъаным «кешбэкыр» нахь игъэкIотыгъэу зыгъэфедэхэрэр зекIон Iофхэм ягъэцэкIэн зыпшъэ илъхэр ары.

Мы илъэсым «туристическэ кешбэк» аIоу бэрэ зэхэтэхы. Ар зекIонымкIэ Федеральнэ агентствэм къыгъэхьазырыгъэ программэу тихэгъэгу ичIыпIэ зэфэшъхьафхэм зыгъэпсэфакIо кIохэзэ зыкъэзып­лъыхьэхэрэм ахъщэу ащ тырагъэкIуадэрэм щыщ къэралыгъо субсидиеу цIыфхэм къаратыжьыщтым епхыгъ.

Мы Iофым игъэцэкIэн аужырэ илъэсхэм нахь анаIэ тырагъэтэу, шъолъыр пэпчъ зыгъэпсэфакIохэр къырагъэблагъэхэу, хьакIэхэм къызэрапэгъокIыщтхэм ыгъэгумэкIыхэу рагъэжьагъ. ЗыплъыхьакIохэу хэгъэгу кIоцIым щызекIохэрэм ахэхъо. Ау икIыгъэ 2020-рэ илъэсым къыздихьыгъэ пандемием тигъашIэ илъэныкъуабэ къызэблихъугъ.

Илъэсым къехъугъэу тицIыфхэр IэкIыб хэгъэгухэм закъыщагъэпсэфынэу мыбыбыжьхэми, тэри чIыпIэ гъэшIэгъоныбэ зэрэтиIэр къагурыIуагъ.

ЗекIон индустриеу къэралыгъо экономикэм хэхъоныгъэшIухэр езыгъэшIыхэрэм нахь зырагъэушъом­бгъуным фэшI Федеральнэ программэ зыкIаштагъэр. ЦIыфхэр зыгъэпсэфакIо кIонхэм тырагъэгушIухьанхэм пай «туристическэ кешбэкыр» къызыкIыхахыгъэр. Зызэрэбгъэпсэфыгъэм тефэгъэ ахъщэм щыщ къэралыгъо субсидиеу ахэм къазэраратыжьыщтыр ары кешбэккIэ тызаджэрэр.

Ростуризмэми Правительствэми кешбэкым цIыфхэмкIэ ишIуагъэ къызэрэкIощтыр ыкIи хэгъэгу кIоцI зекIоным хэхъоныгъэхэр зэрэригъэжьэщтхэм яцыхьэ телъ. ЦIыфхэм агъэкIорэ ахъщэм щыщэу хабзэм къа­ритыжьыщтыр зыфэдизыри агъэнэфэгъах, ар процент 20 мэхъу. ГущыIэм пае, цIыфым къыщэфыгъэ путевкэм сомэ мин 30 лъитыгъэмэ, ащ щыщэу минитфыр ежьым къыIэкIэхьэжьыщт.

Сыда ащ пае шIэгъэн фаер?

Кешбэкыр зыщыбгъэфедэн плъэкIыщт охътэ пIалъэхэр хабзэм къегъэнафэх. Аужырэу къыхахыгъэр гъэтхапэм и 12-м къыщегъэжьагъэу илъэсэу тызыхэтыр екIыфэ (тыгъэгъазэм и 31-рэ мафэр къыхиубытэу) нэс.

Урысыем исубъектхэр зэкIэ программэм къыхэлажьэх. ЯкъэкIухьан тырагъэкIодэгъэ ахъщэм щыщ къызэратыжьыщтхэр тикъэралыгъо гъунапкъэ имыкIэу зызыгъэпсэфыхэрэр ары. Гъогум, хьакIэщхэм, ашхырэм, экскурсиехэм атефагъэм щыщэу процент 20-р якарточкэхэм къарыхьажьыщт. Ар къыпIэкIэхьажьыным пае шIэгъэн фэе Iофтхьабзэхэр щыIэх, ахэр бгъэцэкIэнхэу щыт.

Зызгъэпсэфырэр зыдэкIогъэ чIыпIэм мэфищырэ чэщитIурэ нахь макIэу щырихы хъущтэп. Путевкэ лъапIэхэр зыщэфыхэрэм къаратыжьыщт кешбэкыри нахьыб, ау сомэ мин 20-м ехъущтэп.

ЗекIонымкIэ Федеральнэ агентствэм ипрограммэ игъэцэкIэн зырагъэжьагъэр икIыгъэ илъэсыр ары. Нэбгырэ мин 300 фэдизмэ кешбэкыр агъэфедагъ, сомэ миллиардым ехъу ахэм къаратыжьыгъ.

ЗыгъэпсэфакIо кIорэ пстэуми субсидиер къаратыжьырэп. КъызэрэпкIухьагъэм тефэрэ ахъщэм ипроцент 20 къыпфигъэзэжьыным пае «Мир» зыфиIорэ карточкэм фэдэ уиIэн фае. Ахъщэу турым лъыпты­гъэр ащ къипхынэу щыт. Кешбэкыр апэрэ мэфитфым къы­кIоцI уикарточкэ къихьажьыщт.

Турым ыуасэ туроператорэу къыхэпхыгъэр ары зыфябгъэхьыщтыр.

ЗыгъэпсэфакIо узэрыкIорэм пэпчъ кешбэкыри къыуа­тыжьыщт. Карточкэр илъэсым къыкIоцI бэрэ бгъэфедэн уфит.

Программэм игъэцэкIэн бэшIагъэп зырагъэжьагъэр. Кешбэкым фэгъэхьыгъэу упчIэхэр зиIэхэм Интернетыр IэпыIэгъу къафэхъущт.

Шъаукъо Аслъангуащ.