Кавказ заом хэкIодагъэхэм афэгъэхьыгъэ шIэжь зэхахьэ Мыекъуапэ тыгъуасэ щыкIуагъ.

ЗыкIыныгъэмрэ ЗэгурыIоныгъэмрэ япчэгоу Мыекъуапэ дэтым хабзэм икъу­лыкъушIэхэр, республикэм иобщественнэ движениехэм ахэтхэр, еджакIохэр, лэжьэкIо къызэрыкIохэр зэхахьэм щызэIукIагъэх. Пчэгум щагъэпсыгъэ нэры­лъэгъу IэпыIэгъум адыгабзэкIи, урысыбзэкIи тетхагъэх я XIX-рэ лIэшIэгъум щыIэгъэ Кавказ заом ехьылIэгъэ гущы­Iэхэр.

Адыгэ Республикэм и Премьер-министрэ игуадзэу Сапый Вячеслав шъыгъо-шIэжь Мафэм фэгъэхьыгъэу къызэгущыIэм, Темыр Кавказым щыпсэурэ лъэпкъхэм заом тхьамыкIэгъошхо къызэрафихьыгъэр хигъэунэфыкIыгъ.

Кавказ заом ыпкъ къикIэу тилъэпкъ итэкъухьагъэ хъугъэу хэгъэгу 50-м къе­хъумэ ащэпсэу. ШIэжь Мафэм дунаим тет адыгэхэр зэрепхых.

— Непэ Адыгэ Республикэм щашIэрэр зэкIэ тишъолъыр ихэхъоныгъэ фэIорышIэ. АщкIэ мэхьэнэ ин зиIэр лъэпкъыбэ зыщыпсэурэ республикэм ис цIыфхэм ягуетыныгъ. Адыгэ Республикэм и ЛIышъхьэу Къум­пIыл Мурат Къэралбый ыкъом ыцIэкIэ Адыгеим щыпсэухэрэм зэкIэми сафэлъаIо насып яIэнэу, шIур апэкIэ къикIэу щыIэнхэу, — къыIуагъ Сапый Вячеслав.

Адыгэ Республикэм и Парламент и Тхьаматэ игуадзэу Шъао Аскэр, респуб­ликэ общественнэ движениеу «Адыгэ Хасэм» итхьаматэу ЛIымыщэкъо Рэмэзан зэхахьэм къызыщэгущыIэхэм, лъэпкъ лъэпсэич заоу тишъолъыр щыкIуа­гъэм тилъэпкъэгъу минишъэ пчъагъэ зэрэхэкIодагъэр, лъэпкъышхоу щытыгъэ адыгэхэр макIэ хъухэу къызэрэнагъэхэр, егъэзыгъэкIэ ячIыгу икIыжьынхэ фае зэрэхъугъэр къаIуагъ. Лъэпкъышхоу культурэ ин зиIагъэм чIэнэгъэшхохэр ышIыгъэх.

БлэкIыгъэ уахътэм зыфэдгъазэзэ, тятэжъ пIашъэхэу зэо хьылъэм хэкIодагъэхэм шъхьащэ афэтэшIы. Япчъагъэ­кIэ адыгэхэр макIэ хъухэу къэнагъэхэми, республикэ яIэу мэпсэух, яныдэлъфыбзэ, шэн-хабзэхэр къагъэнагъэх, янеущрэ мафэ нахьышIу зэрэхъущтым яцыхьэ телъэу лъэпкъ зыкIыныгъэр агъэпытэ, мамыр щыIакIэр агъэдахэ.

Концерт-реквиемыр къызэIуихыгъ Адыгэ Республикэм и Къэралыгъо орэдыIо-къэшъокIо ансамблэу «Ислъамыем». Гъыбзэ орэдэу «Сэрмафэр», тилъэп­къэгъу лIыхъужъхэу ячIыгу къэзыухъумагъэхэм афэгъэхьыгъэ орэдхэр «Ислъамыем» иартистхэу ХъокIо Сусанэ, Дзыбэ Руслъан, Шъымырзэ Казбек, Къумыкъу Щамсудин, Эльдарэ Айдэмыр, нэмыкIхэм агъэжъынчыгъэх.

Ансамблэхэу «Ащэмэзым», «Ошъутенэм», фэшъхьафхэм шIэжь орэдхэу къыхадзагъэхэм гур агъэузы. УядэIузэ, лъэпкъым къинэу зэпичыгъэр нэгум къыкIэуцо.

Лъэпкъ театрэу Цэй Ибрахьимэ ыцIэ зыхьырэм иартистхэу Кукэнэ Мурат, Зыхьэ Мэлайчэт, Жъудэ Аскэрбый, Тхьаркъохъо Мэрджанэт, Бэгъушъэ Анзор къызэджэгъэ усэхэм рэхьатэу уядэIун плъэкIырэп… МашIом мыжъор есты, цIыфыр хэкIуадэ. Арэу щытми, тилъэпкъ иджэныкъо машIо кIосагъэп. Адыгэ лъэпкъым зиужьыжьын, пытэу ылъэ теуцон ылъэкIыгъ.

Хъут Рустам, Еутых Вячеслав, нэ­мыкIхэм яорэдхэри шIэжьым, лIыгъэм яхьылIагъэх. КIэлэцIыкIу зыгъэсапIэу «Щыгъыжъыем» хэтхэм яусэхэри щыIэныгъэм, мамыр псэукIэм игъэпытэн афэгъэхьыгъэх. «Ошъутенэм» къыIогъэ орэдэу «Тэ тыадыг» зыфиIорэмкIэ аухыгъэ зэхахьэм хэлэжьагъэх динлэжьхэри, кIэлэцIыкIухэри. ЛIэужхэр зэзыпхырэ адыгэ быракъыр зыIыгъ кIэлэеджакIом къызэрэтиIуагъэу, къэрэмыхъужь ащ фэдэ зао. Мамырэу тыпсэунэу, тичIыгу тиIофшIэнкIэ дгъэдэхэнэу тыфай. Заом кIэзыгъэстыхэрэр тэумысых, лъэпкъхэр зэщызыхъохэрэм, зэпэзыгъэуцухэрэм адедгъаштэрэп. Тыгъэр тшъхьащытэу чIыр къекIокIыфэ адыгэ лъэпкъыр дунаим зэрэтетыщтыр зэхахьэм къыхэщыгъ.

ЕмтIылъ Нурбый.