Аужырэ одыджыным имэфэкI
ЕджапIэхэм къачIэкIыхэрэм аужырэ одыджыныр къафытеуагъ. Ар мэфэкI дахэу республикэм икъалэхэм, ичылэхэм ащыкIуагъ.
Мыгъэ зэкIэмкIи еджапIэхэр нэбгырэ мини 6-рэ ныкъорэ фэдизмэ къаухы. Ащ щыщэу я 11-рэ классыр 1781-мэ, я 9-рэр 4689-мэ къаухых.
Адрэ илъэсхэм афэдэу еджапIэм дэгъу дэдэу щеджагъэхэу, дышъэ медаль къыхьыным фэбанэхэрэр кIэлэеджакIохэм ахэтых, ахэр нэбгырэ 200-м ехъу.
ГъэрекIо мэфэкI линейкэхэр щыIэнхэу хъугъэп, арын фае ахэр мэфэкI шъыпкъэ мыгъэ зыкIэхъугъэхэр. Шъыпкъэ, линейкэм къекIолIэщтыр нахь макIэ шIыгъэным еджапIэхэм япащэхэм мыгъи анаIэ тетыгъ. ЕджапIэм къычIэкIыхэрэмрэ ахэм янэ-ятэхэмрэ арых ныIэп линейкэм рагъэблэгъагъэхэр. Арэу щытми, мэфэкIыр гушIуагъо хэлъэу еджапIэхэм ащыкIуагъ. Джы ныбжьыкIэхэм ушэтынхэр къяжэх, ягухэлъышIухэр къадэхъунхэу тафэлъаIо!
Сурэтыр «Адыгэ макъэм» ихъарзынэщ къыхэтхыгъ.