ИшIэныгъэхэр Москва къыщигъэлъэгъощтых
Телекъэтынэу «Умницы и умники» зыфиIорэр зызэхащагъэм къыщегъэжьагъэу Адыгеим икIыгъэ ныбжьыкIэ пчъагъэ ащ хэлэжьагъ. Зэрифэшъуашэу зыкъыщагъэлъэгъуагъ ыкIи Урысыем иапшъэрэ еджэпIэ анахь дэгъухэм ачIэхьагъэх. Мы мафэхэм Урысые телевизионнэ гуманитар олимпиадэм ишъолъыр уцугъо Адыгеим щыкIуагъ, анахь дэгъухэр къыхахыгъэх. Зэнэкъокъум зэкIэмкIи республикэм икIэлэеджэкIо 33-рэ хэлэжьагъ
Тарихъым ылъэныкъокIэ сэнаущыгъэ ин зыхэлъ ныбжьыкIэхэр ары мыщ хэлэжьагъэхэр. Зэнэкъокъум темэу иIагъэр: «Эпоха Петра Великого». КIэлэеджакIохэм зэрифэшъуашэу зыфагъэхьазырыгъ, литературэ зэфэшъхьафхэм яджагъэх, тарихъыр зэрагъэшIагъ ыкIи шIэныгъэ дэгъухэр къагъэлъэгъуагъэх.
Зэфэхьысыжьхэм нафэ къызэрашIыгъэмкIэ, зэнэкъокъум анахь шIэныгъэ куу къыщызыгъэлъэгъуагъэр Мыекъопэ гурыт еджапIэу N 15-м икIэлэеджакIоу Владимир Овчинниковыр ары.
Джэджэ районым дэт гурыт еджапIэу N 1-м щеджэрэ Эвелина Кондратовичрэ Тэхъутэмыкъое районым ит гурыт еджапIэу N 27-м икIэлэеджакIоу Матвей Мельникрэ джащ фэдэу анахь дэгъуищымэ ащыщ хъугъэх. Бжыхьэм Москва щыкIощт телевизионнэ олимпиадэу «Умницы и Умники» зыфиIорэм Владимир Овчинниковыр хэлэжьэщт.
Ащ нэмыкIэу, анахь дэгъоу зыкъэзыгъэлъэгъогъэ нэбгырэ 11-мэ АР-м гъэсэныгъэмрэ шIэныгъэмрэкIэ и Министерствэ идипломхэр афагъэшъошагъэх. Iофтхьабзэм кIэщакIо фэхъугъэх АР-м гъэсэныгъэмрэ шIэныгъэмрэкIэ и Министерствэ, Адыгэ къэралыгъо университетыр, республикэ естественнэ-хьисап еджапIэр, шIэныгъэхэм зыщахагъэхъорэ республикэ институтыр.
ДЕЛЭКЪО Анет.